Николай Николаевич хайыһар спордугар сыстыыта уон икки сааһыттан саҕаламмыта. Бииргэ төрөөбүт эдьиийэ Николаева Евдокия Николаевна, оччолорго Бүлүү педучилищетыгар үөрэнэ сылдьан хайыһар спордунан күүскэ дьарыктанан кэккэ ситиһиилэрдэммит, педучилище чемпионката, Бүлүү улууһун сүүмэрдэммит хамаандатын чилиэнэ, республика орто үөрэхтэрин заведениеларын икки ардыгар хайыһар күрэҕэр чемпионката, призера, республика кыһыҥҥы Спартакиадатыгар иккис миэстэлээх призера, хайыһарга бастакы разрядтаах быраатын Николайы хайыһарынан сүүрүү техникатыгар уһуйбута. Онтон ыла хайыһарынан сүүрүүгэ сэттис кылааска үөрэнэ сылдьан оскуола чемпиона буолбута. Ити сыл оскуолаҕа физругунан Хабытчаров Гаврил Григорьевич диэн оройуон күүстээх сүүрүгэ, хайыһардьыта кэлэн үлэлээбитэ. Николайы дьиэтигэр ыҥыран анал кинигэ уларсан, хайыһар техникатын араас ньымаларын баһылыырга, хайыһары маастыырга, оҥосторго үөрэппитэ. Николай Гаврил Григорьевич үөрэппит ньыматынан хайыһарга эрчиллиитин бырахпатаҕа. Онуска үөрэнэр сылыгар саҥа үөрэҕин бүтэрбит физкультура учуутала Золотарев Григорий Степанович диэн хайыһарга маастарга кандидат оскуолаҕа үлэлии кэлбитэ. Григорий Степанович Николайга учуутал да, тренер да буолбута. Ол сылтан иккиэн эрчиллэн барбыттара, сэтинньи ортотугар дылы таһырдьа, ол кэннэ дьиэ иһигэр киирэн араас ньыманан техникаҕа эрчиллэллэрэ. 1975 с. кулун тутарыгар Кэнтик нэһилиэгэр хайыһарга оройуон күрэхтэһиитэ буолбута. Онно Николай уонна учуутала Григорий Степанович иккиэн чемпионнаабыттара. Кэлин Николай оройуон араас сыллаах чемпионнарын, призердарын Гольдеров Петр Федоровичтыын, Егоров Аркадий Кузьмичтыын, бастакы тренерэ Хабытчаров Гаврил Григорьевичтыын, Иванов Иван Николаевичтыын (Кылгас сис), республикаҕа сүүрүүгэ элбэх төгүллээх чемпион, призер Сергеев Юрий Герасимовичтыын, республика призера Барахова Ульяна Тимофеевналыын Бүлүү зонатыгар, республика чемпионаттарыгар уонча сыл ситиһиилээхтик кыттыбыттара, улууска хайыһар спорда сайдарын туһугар үгүс көмүс көлөһүннэрин тохпуттара. Николай Николаевич күүстээх I разрядтаах хайыһардьыт.