1937-1940 сс. 3000-5000 м дистанцияларга сүүрүүгэ уонна хайыһарынан 10 км уһуҥҥа байыаннай куоталаһыыга иннигэр кими да түһэрбэтэх спортсменынан Ф.Ф. Федоров буолар.

Федор Федорович 1915 с. Үөһээ Бүлүү Кэнтигэр төрөөбүтэ. Кини бииргэ төрөөбүт балта Мария Федорова Нам Партизаныттан суруйарынан, убайа Федор 1929 с. комсомолга киирбит, онтон Ворошилов аатынан колхозка суотчутунан үлэлии олорон 1935 с. Дьокуускайга үөрэнэ барбыт.

Федор Федоров бастаан Дьокуускайдааҕы медицинскэй училище бастакы курсун бүтэрбит, онтон Саха национальнай байыаннай оскуолатыгар көспүт. Салгыы үөрэммит оскуолатыгар отделение командирынан үлэлии хаалбыт. Кини салайбыт пулеметнай отделениета оскуола бастыҥ көрдөрүүлээх подразделениетынан буолбут. Бу отделение курсаннарыттан Иван Ларионов Советскай Армия полковнигар тиийэ үүммүтэ.

Федор Федоров 1937 с. ыытыллыбыт Бүтүн Саха сиринээҕи III Спартакиадаҕа 5000 м дистанцияны 18 мүн. 03 сөк. кэлэн, чемпион үрдүк аатын ылбыта. Кини оччотооҕу кэм аатырбыт спортсменнарын В. Алантьевы, Брицкайы уо.д.а. кэннигэр хааллартыыра. Онтон 1940 с. 3000 м дистанцияны 9 мүн. 52 сөк. уонна 5000 м дистанцияны 17 мүн. 30 сөк. кэлбитэ. Саха АССР үрдүнэн атаҕынан сүүрүүгэ олохтообут рекортара уһун сыллар усталарыгар тупсарыллыбакка турбуттар.

Ф.Ф. Федоров 1939 с. саахалга түбэспит самолет көрдөөһүнүгэр тохсунньу, олунньу ыйдар хатан тымныыларыгар, ыала суох Дьааҥы хайаларыгар балтараа ый устата хайыһарынан сылдьыбыта.

1941 с. кулун тутар 2 к. “Эдэр большевик” хаһыакка хайыһарынан хайдах дьарыктанарын туһунан суруйбута биһиэхэ 21 үйэ дьонугар туһалаах буолуоҕа.

—                    Хайыһар спордугар Дьокуускай куорат уонна Саха АССР үрдүнэн 1935 сылтан 1940 сылга диэри ыытыллар күрэхтэһиилэргэ мин бастакы миэстэлэри ылаттаабытым. Маннык ситиһиилэри мин хайдах ситистим? Хайыһар спордунан дьарыктанарга туох ханнык иннинэ былаан оҥостобун. Манна хайа күн, ханнык сиргэ, төһө бириэмэҕэ сылдьарбын барыбын учуоттуубун. Бу иннинэ хайыһарым саккаактарын кыһыйабын, иэҕэбин, хатарабын, оҕунуохтуубун, быаларын сэлбийэн бөҕөргөтөбүн.

Хайыһарынан хаамарга мин түөрт: нууччалыы, финнии, перекидка, попеременнай стиллэри билэбин. Бу стиллэринэн хаамыылары барыларын сатыыр буоллахха, киһи сылайбат, уларыта барар, түргэтиир. Хайыһардьыт киһи этин, түөһүн, атаҕын ыраастык туттара наадалар. Кини ис таҥаһын, хайыһардыырга кэтэр көстүүмүн сотору-сотору уларыттара сөп. Мин бу усулуобуйалары быраабыла курдук тутуһабын. Маны таһынан, хас сарсыарда ахсын физкультурнай зарядкалары оҥоробун. Физкультурнай зарядка киһи этин-хаанын чэбдигирдэр, бэһиэлэй буолууну үөскэтэр. Мин хайыһар спордугар бастыҥ миэстэлэри ылаттаабыт опыттарым итинниктэр.

Федор Федоров байыаннай бастыҥ көрдөрүүлэрин иһин 1940 с. “РККА туйгуна” бэлиэнэн наҕараадаламмыта.

Гурьев Константин Никитич СНБО туһунан кинигэтигэр суруйбутунан, Федоров байыаннай оскуола комсомольскай тэрилтэтин секретарынан талыллыбыт эбит. Кини партия обкомун байыаннай отделын инструкторынан үлэлии сылдьан фроҥҥа бэйэтэ тылланан барбыт.

Саха биир туйгун уола, младшай лейтенант Федоров Ф.Ф. 1943 с. олунньу ый 11 к. сэрии толоонугар охтубут. Кини Волгоград Мамаев Курганыгар көмүллүбүт.