Мас тардыытыгар РФ спордун маастара.

         Эрчим Тамалакаан нэһилиэгэр 1994 с. төрөөбүтэ, Тамалакаан орто оскуолатын 2012 с. үөрэнэн бүтэрбитэ. Кини 9 кылааска үөрэнэ  сылдьан Үөһээ Бүлүүгэ Дмитриев Александр Саввичка эрчиллэ кэлбит  уонна эһиилигэр оҕолорго Саха сиригэр III м, Россия куоталаһыытыгар II м ылаттаабыта.

Эрчим оскуола кэнниттэн ХИФУ физкультура уонна спорт салаатыгар үөрэнэ киирбитэ, 2016 с. үөрэҕин бүтэрэн, билигин магистратураҕа үөрэнэ сылдьар.

Бу үөрэнэр кэмигэр эрчиллиитин РФ үтүөлээх тренерэ Давыдов Петр Николаевичка салгыыр уонна ситиһиилэрэ күөс үллэрин курдук өрө тахсар. 2015 с. эдэрдэргэ СР муҥутуур кыайыылааҕа буолар, 2015 с. Россияҕа эдэрдэргэ эмиэ абсолютнай чемпион буолар. Бу куоталаһыы Долгопруднай куоракка буолбута. 2015 с. Амур куоракка Дальнай Восток чемпиона буолар. 2016 с. Сыктывкар куоракка Россия национальнай көрүҥнэригэр Олимпийскай оонньуулар программаларыгар киирбэт көрүҥнэригэр фестивальга I м ылбыта. 2017 с. Олимпийскай чемпион Р. Дмитриев бирииһигэр Москва куоракка ыытыллыбыт турнирга 105 кг чемпион буолбута. 2017 с. ХХ юбилейнай Манчаары Спартакиадатыгар кыттарга путевка былдьаһыылаах Саха сирин чемпионатын 105 кг чемпиона. 2017 с. Россия чемпионатын 105 кг ыйааһыннаахтарга чемпиона. Онон аны сайын мас тардыһыытыгар Үөһээ Бүлүү хамаандатыгар киирэн Манчаары оонньууларыгар кыттыаҕа.

Саха сирин аатырбыт күүстээҕэ, Уус-Алдан киһитэ Күүстээх Уйбаан көтөҕөр 181 кг ыйааһыннаах тааһын көтөҕөн, 6 м 79 см ыраахха илдьэн үһүс көрдөрүүлээх. Нуучча бухатыыра Колибабчук уонна да атын ааттаахтар салгын да киллэрбэтэхтэрэ.

         Эрчим Баппаҕай эдэр киһи, онон кини ситиһиилэрэ иннигэр.