Дьулуурунан, дьаныарынан элбэҕи ситистэ

         Баттахов Петр Петрович 1952 с. муус устар ый 21 к. Ньурбаҕа Бэстээх нэһилиэгэр төрөөбүтэ. Үлэтин Тамалакаан оскуолатын математикаҕа уонна физкультура учууталынан саҕалаабыта. Эдэр,  эрчимнээх киһи 1980-1983 сс. Хоро орто оскуолатыгар директорынан үлэлиир. Онтон салгыы Тамалакаан оскуолатыгар завуһунан, Өргүөт нэһилиэгэр Сэбиэт исполкомун председателинэн, Нам совхозрабкообугар 4 сыл үлэлиир. Петр Петрович 1993-1998 сс. Ньурба ыччатын киэһээҥи оскуолатыгар директорынан үлэлээн баран Дьокуускай куорат Маҥан орто оскуолатыгар физика, физкультура учууталынан үлэлиир. Петр Петрович ханна да үлэлээбитин иһин спордунан бэйэтэ дьарыктанар, ыччаты, оскуола оҕотун эт-хаан өттүнэн сайдарыгар улахан болҕомтотун уурара. Петр Петрович СР мас тардыһыытыгар Ньурба улууһуттан бастакынан спорт маастара буолбута, ону таһынан хапсаҕайга СР спордун маастара. Петр Баттахов Саха сиригэр эрэ буолбакка, Россия, Аан дойдуга тиийэ биллибит спортсмен, ол курдук 50 сааһыттан үөһэ саастаахтарга Россия мас тардыһыытыгар муҥутуур кыайыылааҕа, ити Калуга куоракка 2009 с. ситиһиллибитэ. Ону таһынан 2016 с. Курскай куоракка ыараханы көтөҕүүгэ аан дойду ветераннарга чемпиона буолбута. Манна Петр 200 кг көтөхпүтэ. 2017 с. Хабаровскай куоракка СНГ чемпиона уонна рекордсмена буолбута, 205 кг көтөхпүтэ.

         Петр Баттахов айылҕаттан күүстээх-уохтаах буолан төһө да сааһырдар күүһэ-уоҕа  мөлтөөбөт, ол иһин билиҥҥэ дылы күрэхтэһэр, ол курдук 1992 с. IV спортивнай оонньууларга Чурапчыга мас тардыһыытыгар II м ылар, 1993 с. Покровскайга Манчаары Спартакиадатыгар III м буолар, Хатаска республикаҕа чемпионнуур. Петр системалаахтык дьарыктанар буолан республика чемпионаттарыгар сыллата кэриэтэ кыттар. 2003, 2004, 2006, 2007 сс. республика чемпионаттарыгар миэстэлэспитэ.

         Хапсаҕайга Петр Баттахов 1990 с. Антоновкаҕа буолбут СР ыарахан эрэ ыйааһыннаах бөҕөстөрүн тустууларыгар III м буолбута, 1993 с. Буучугурас, 1995 с. В. Румянцев бириистэригэр миэстэлэспитэ, 1996, 1997 сс. В. Ефремов бирииһигэр II м ылбыта. Маны таһынан Петр Петрович сахалыы үс көрүҥҥэ ветераннар ортолоругар 2002 с. Саха Республикатыгар II м ылар. Бүөтүр эдэригэр 1978 с. Үөһээ Бүлүү атах оонньуутугар хамаандатыгар киирсэн (Прокопьев Аркадий, Николаев Василий, Баттахов Петр) III м ылан турардаах. Көҥүл тустууга ветераннар ортолоругар 2012, 2014 сс. СР чемпиона буолбута. Онон Петр Петрович спорт хас да көрүҥэр ситиһиилэрдээх. Петр Баттахов маны таһынан спорт судьуйатын быһыытынан киэҥник биллэр. Ол курдук мас-рестлинг көрүҥэр аан дойду категориялаах судьуйа. Петр элбэх чемпионаттарга, турнирдарга судьуйа быһыытынан үрдүк хаачыстыбалаахтык үлэлиир, 2008 с. Россия чемпионатыгар Москва куоракка 2008, 2016 сс. оҕолор Азиятааҕы IV, VI оонньууларыгар судьуйалаһар, 2012 с. аан дойду кубогын 4 этабыгар барытыгар судьуйалыыр, 2012 с. аан дойду муҥутуур кыайыылааҕын быһаарар турнирга Минскэй куоракка эмиэ судьуйалаһар. Азия чемпионатыгар 2013 с., Россия чемпионатыгар 2014 с., Аан дойду кубогар 2015 с., Россия 2015 с. чемпионатыгар уонна Аан дойду 2014 с., 2016 с. чемпионаттарыгар үрдүк таһаарыылаахтык судьуйалаабыта.

         Петр Петрович учуутал, салайааччы, спортсмен, спортивнай судьуйа быһыытынан үлэтэ кэмигэр сөптөөхтүк сыаналанна диэххэ сөп. Ол курдук Петр өр кэмҥэ олохсуйан олорбут Тамалакаанын нэһилиэгин бочуоттаах олохтооҕо (2016 с.), СР спортка министерствотын “За заслуги и развитие физической культуры и спорта РС (Я)” знагынан, Чаппанда нэһилиэгин бочуоттаах олохтооҕо, 2012 с. норуот үөрэҕириитин туйгуна знагынан, Үөһээ Бүлүү, Ньурба администрацияларын грамоталарынан 1982, 1998, 2011 сс. наҕараадаламмыта. 1997 с. спорт министерствотын Бочуотунай грамотатынан наҕараадаламмыта. Россия мас-рестлинг Федерациятын Бочуотунай грамотатынан 2007, 2012 сс. наҕараадаланар. Маны таһынан Петр Петрович Ньурбаҕа үлэлиир кэмигэр Георгий Русланович Балакшины үөрэтэ сылдьыбыт эбит уонна биллиилээх боксер үрдүк ситиһиилэри ыларыгар үөрэппит-такайбыт. Билигин Балакшин спорт министрэ, аан дойду, Олимпийскай оонньуулар призердара, Россия алта төгүллээх, Европа үс төгүллээх чемпиона.

         Петр Петрович учуутал, директор, завуч быһыытынан таһаарыылаахтык үлэлээбитэ, үөрэх салаатын грамоталарынан наҕараадаламмыта, 1978 с. саҕалаан оҕолору физика, математика оройуоннааҕы, республикатааҕы олимпиадаларыгар ситиһиилээхтик кытыннарбытын иһин 1978, 1980, 1982, 1984, 1985, 1986 сс. Махтал суруктар, Бочуотунай грамоталар туттарыллыбыттара.

         Бу кэмҥэ Петр Петрович урбаанньыт, бу үлэнэн дьарыктаммыта ыраатта, 2011 сылтан. Петр Баттахов Үөһээ Бүлүү Тамалакааныгар күтүөт, билигин Дьокуускай куоракка олорор, кэргэннээх, түөрт оҕолоох, оҕолор бары үлэлээх-хамнастаах,  атахтарыгар турбут ыаллар, 4 сиэннээх. Онон Петр Петрович спортка, олоххо дьулуурдаах, дьаныардаах буолан, айылҕа барахсан бэрсибитин таба туһанан элбэҕи ситистэ, билигин да үлэлии-хамсыы, айа-тута сылдьар.