Гаврил Сергеевич 1975 с. ахсынньы 10 к. Үөһээ Бүлүү оройуонун Нам нэһилиэгэр төрөөбүтэ. Гаврил оҕо эрдэҕиттэн туругас-олоругас, сүүрэрин-көтөрүн сөбүлүүр этэ. Нам орто оскуолатыгар үөрэнэ сылдьан спорт араас көрүҥнэринэн дьарыктаммыта, оскуола уонна оройуон күрэхтэһиилэригэр мэлдьи ситиһиилээхтик кыттара.

         Гаврил 2004 с. Бүлүүтээҕи педагогическай колледжы, 2007 с. ХИФУ физкультурнай отделениетын ситиһиилээхтик үөрэнэн бүтэртээбитэ. Педучилищены бүтэрэр сылыттан үөрэммит Намын оскуолатыгар физкультура учууталынан ситиһиилээхтик, айымньылаахтык үлэлии сылдьар.

         Гаврил Сергеевич училищеҕа үөрэнэр сылларыттан мас тардыһыытынан утумнаахтык дьарыктаммыта, Бүлүү зонатын, республика араас таһымнаах күрэхтэһиилэригэр ситиһиилээхтик кыттан Саха Республикатын спордун маастарыгар кандидат нуорматын толорбута. Гаврил Сергеевич 2015 с. ветераннар категорияларыгар тахсан кыайыылаахтык күрэхтэһэ сылдьара үөрдэр.

         Кини ветераннарга мас тардыһыытыгар сүрүн ситиһиилэрэ манныктар:

2015 с. Хатаска ыытыллыбыт “Көмүс мас” республиканскай турнир кыайыылааҕа, Горнай улууһугар ыытыллыбыт Дмитрий Никаноров бирииһигэр иккис миэстэлээх, 2016 с. Төҥүлүгэ ыытыллыбыт республика чемпионатыгар үһүс миэстэҕэ тахсар, “Көмүс мас” турнирыгар иккистээн бастыыр, Ньурбаҕа ыытыллыбыт “Кэрэ киһи уола” республиканскай турнирга уонна Саха Республикатын чемпионатыгар кыайар. 2017 с. “Кэрэ киһи уола”, С. Быкалыров бириистэригэр ыытыллыбыт турнирдарга бастаталыыр, Саха Республикатын чемпионатыгар иккистээн кыайар.

Гаврил Сергеевич Нам орто оскуолатыгар мас тардыһыы тренеринэн общественнай төрүккэ олоҕуран үлэлиир. Кини эрчийэр оҕолоро Бүлүү зонатыгар, республикаҕа уонна киэҥ Россияҕа араас күрэхтэһиилэргэ өрүү миэстэлэһэр буоллулар. Гаврил Сергеевич оҕолорун салгыы маннык дьарыктаатаҕына ааттаах-суоллаах мас тардыһааччылар үүнэн-сайдан тахсыахтара диэн эрэниллэр.

Гаврил Сергеевич мас тардыһыытыгар эрчийэр оҕолоро кылгас кэм иһигэр киһи мыыммат ситиһиилэннилэр. Ол курдук, Чысхаан Мухоплев 2011 с. Сунтаарга А.К. Акимов турнирын кыайбыта, 2013 с. Тааттаҕа ыытыллыбыт Саха сирин оҕолорго чемпионатыгар Олиган Ботуев чемпион, Өркөн Жендринскэй II призер буолбуттара, 2014 с. Суздаль куоракка ыытыллыбыт оҕолорго Россия чемпионатыгар Николаев Дима III миэстэни ылан биир дойдулаахтарын үөрдүбүтэ, 2016 с. Үөһээ Бүлүүгэ А. Кузнецов бирииһигэр ыытыллыбыт республиканскай турнирга Максим Назаров, Айсен Ботуев II, III миэстэлэри ылбыттара, Айхал Бюлтясов абсолютнай чемпион буолбуттара, 2015, 2016 сылларга Үөһээ Бүлүү улууһун баһылыга В.С. Поскачин бирииһигэр ыытыллыбыт многоборьеҕа Айсен Ботуев икки көрүҥҥэ II, III миэстэлэри, ити сыл Чурапчы улууһун многоборьеҕа аһаҕас чемпионатыгар I миэстэни ылбыта.