Егор Яковлевич 1937 с. балаҕан ыйын 17 к. Үөһээ Бүлүү оройуонун Тамалакаан нэһилиэгэр төрөөбүтэ.

         Егор үйэтин тухары тракториһынан үлэлээбитэ. Егор доруобай, бөҕө, улахан 2 миэтэрэ кэриҥэ уҥуохтаах киһи этэ. Кини уһун сайыны быһа икки буруустаах косилканан 800 га сири солбуга суох оҕустарара, техниканы үчүгэйдик билэр, кыһамньылаах, мындыр, сэмэй киһи этэ. Табаарыстара кинини “Уһун Дьөгүөр” диэн ааттыыллара. Ийэтэ өлбүтүн кэннэ эдьиийинээн иккиэн олорбуттара.

         Егор сэниэлээх киһинэн биллэрэ, кыһыннары-сайыннары солбуллубакка ДТ-75 тракторга үлэлиирэ. Сарсыарда эрдэ, халлаан сырдыы илигинэ туран үлэтигэр барара уонна киэһэ хойут, хараҥаҕа кэлэрэ.

Уһун Дьөгүөрү күүстээҕин иһин, хаһан да мас тардыспатах киһини “Манчаары оонньуулара” I Спартакиадаҕа Үөһээ Бүлүү хамаандатыгар ылан күрэхтэһиннэрэллэр, онно кини II миэстэни ылбыта. Ити 1968 сыллаахха этэ, туох да эрчиллиитэ суох,  хонууттан хомуллан баран күрэхтэһиигэ кыттыбыт киһи. Ол кэнниттэн Бүлүү зонатын күрэҕэр хаста да кыттан бастаабыта. Ити кэннэ Дьөгүөр ханнык да күрэхтэһиигэ кыттыбатаҕа.