Биһиги улууспутугар Василий Афанасьевич Григорьев диэн көстөр дьүһүнүнэн толуу-мааны, дьоҥҥо сыһыанынан киһи үтүөтэ олорон, үлэлээн ааспыттаах. Бэйэтэ Амматтан төрүттээҕэ. Исидор Барахов аатынан совхозка инженер-механигынан үлэлээбитэ.

Василий Афанасьевич эдэриттэн бэйэтигэр айылҕа биэрбит күүһүн-уоҕун туһанар туһуттан спорт элбэх көрүҥнэригэр эрчиллибитэ. Оскуолатааҕы сылларыттан волейболга, баскетболга ситиһиилэринэн республика күрэхтэһиилэригэр кыттан барбыта. 1962-1967 сылларга республика эдэрдэргэ уонна орто үөрэх заведениеларын хамаандаларыгар оонньообута.

1968 с. Амма хамаандата республика тыатын улуустарыгар волейболга чемпионнаабыта, онно Баһылай төһүү оонньооччунан буолбута.

Василий Афанасьевич аҥардас күүстээх мас тардыһааччынан, волейболиһынан эрэ биллэр буолбатах. Кини чэпчэки атлетика араас көрүҥнэригэр эмиэ үрдүк ситиһиилэрдээх. Урукку Спартакиадаларга кыттан ядрону 11 м 25 см анньан, диискэни 39 м ордугу бырахпыттаах. Мас тардыһыытыгар Василий Григорьев 1968 с. буолбут Манчаары Спартакиадатыгар волейбол оонньуу сылдьан кыттыбыта. Ол саҕана Манчаарыга ыйааһыннарынан арахсан күрэхтэһии диэн суох этэ. Онно Василий Афанасьевич Үөһээ Бүлүү Тамалакааныттан сылдьар Егор Гольдеров диэн күүстээх мас тардыһааччыга хотторон 19 киһиттэн үһүс буолбута. Дьэ итинник, бэйэтигэр да соһуччу кэлбит ситиһии кэннэ мас тардыһар буолан барбыта. Бииртэн биир кыайыы кини опытын байытан-хаҥатан испитэ, өссө үрдүккэ, кыайыыга-хотууга дьулуһарыгар көмө-тирэх буолбута. Кини Амматыгар 1967-1969 сс., 1972-1974 сс. мас тардыһыытыгар кимиэхэ да кыайтарбат буолбута.

1969-1972 сс. Өлүөхүмэҕэ мас тардыһыытыгар аҥардастыы бастыы сылдьыбыта. Онтон 1975-1976 сс Уус-Алдаҥҥа ыарахан ыйааһыҥҥа бастаабыта. Ити улууска Баһылай Манчаары Спартакиадатын икки төгүллээх чемпионун С. Заровняевы кыайбыта. Өссө кини 1980-1990 сс. Үөһээ Бүлүү Буучугураһын Спартакиадаларын, улуус ыһыаҕын кыайыылаахтарынан буолбута. Василий Афанасьевич 1981 с. Бүлүү зонатын абсолютнай чемпиона, 1983 с. Майаҕа буолбут Манчаары Спартакиадатыгар 4-с миэстэни ылары ситиспитэ, 1985 с. Бүлүү куоратыгар ыытыллыбыт Манчаары Спартакиадатыгар мас тардыһыытыгар абсолютнай күрэхтэһиигэ 24 киһи кыттыбыта. Онно, оччолорго аатыра сылдьыбыт Дмитрий Шариҥҥа кыайтаран, иккис буолбута.

Дэгиттэр спортсмен Василий Григорьев бирииһигэр Нам нэһилиэгэр 1996 с. мас тардыһыытыгар аһаҕас турнир ыытыллыбыта. Онно Амма, Ньурба, Бүлүү күүстээх мас тардыһааччылара кыттыбыттара. Күрэхтэһии олус көхтөөхтүк ыытыллыбыта, хас да саҥа ааттары арыйбыта.

В.А. Григорьев ыччакка чахчы бары өттүнэн үтүө холобур буолар киһи этэ,   үлэһитинэн, спортсменынан, киһи да быһыытынан. Кини көҕүлээһининэн олорбут, үлэлээбит Намын нэһилиэгэр бэртээхэй тимир эриһиэҥкэлээх стадион баар. Бу стадиоҥҥа оскуола үөрэнээччилэрэ, ыччаттара саас, сайын, күһүн мустан эрчиллэллэр, кини туттарбыт стадионугар нэһилиэк, улуус араас таһымнаах күрэхтэһиилэрэ ыытыллар.