Александр Саввич 1982 с. кулун тутар 18 к. Үөһээ Бүлүү улууһун  Хоро нэһилиэгэр төрөөбүтэ. Киһи ханна төрөөбүтүттэн тутулуга суох бу орто дойдуга олоҕу айа кэлэр. Ол эрээри айбытынан дьоҕур бэриллиитэ араастаах, сороххо отой да суох буолуон сөп. Күүс киһи аайы тоҕо биир тэҥ буолбатаҕый, эбэтэр сороххо тоҕо суоҕуй? Киһиэхэ күүс үрдүк айыылартан бэриллэр. Бастаан үрдүк айыылар айаллар, ол айыллыбыты киһи бэйэтэ  салгыы сайыннарар. Кыахтанар диибит. Кыах диэн “кыай” диэн тылтан үөскээбит. Ол аата олох олорор туһугар кыайыахха наада эбит. Кыайбыт эрэ олох олорор, салгыы чэчириир аналлаах. Оттон кыах барыйбыкка барытыгар баар. Күүһү киһиэхэ төрөөбүт буора, ийэ айылҕата, бүөбэйдээбит дьоно-сэргэтэ иҥэрэллэр. Күүс диэн  дьэҥкир уу курдук ыраастан ыраас, күндэлэс күн курдук сырдыктан сырдык, сир симэҕин курдук, киһи күүстээх-күдэхтээх буоллаҕына бу орто дойду эйгэтигэр туругурар. Ол аата киһи ханна, хаһан, кимнээххэ төрөөбүтүттэн тутулуктанан дьоҕура сайдар, талаана арыллар. Оннук дьон олоххо баҕаран туран үлэлиир буоланнар, олоҕу тупсараллар, сайыннараллар.

         Александрга уон биирис кылааһы бүтэрэр экзаменнары туттарыы, экзаменнар түмүктэрин истии, орто оскуола үөрэҕин бүтэрбитин туһунан аттестат ылыы, оҕо саастыын быраһаайдаһыы умнуллубат күннэрэ ааспыттара. СГУ студена буолбута уонна  2007 с. үөрэҕин бүтэрэн бэс ыйын 10 к. диплом ылбыта. Александр Ороһу орто оскуолатыгар үлэлии сырыттаҕына, бэлиэтии көрөн, оҕо спортивнай оскуолатыгар мас тардыһыы тренеринэн анаабыттара. Онтон ыла Александр Саввич айымньылаах үлэтэ саҕаламмыта. Иитиллээччилэрэ, улууска эрэ буолбакка, республика таһымыгар тахсан эрэллэр. Ити ситиһиилэрин иһин Александр Саввичка СР үөрэҕириитин туйгуна аат иҥэриллибитэ.

         Александр Саввич ситиһиилэрэ:

2014 с. СР спордун маастара аат иҥэриллибитэ, 2013 с. Чурапчыга ыытыллыбыт XIX Манчаары Спартакиадатыгар 62 кг 3-с призер, 2010 с. Олоҥхо ыһыаҕын кыайыылааҕа, республика уонна Россия чемпионатын түөрт төгүллээх призера.

         2011 с. рейтинг түмүгүнэн Федерация кубогын муҥутуур кыайыылааҕа уонна “Сахаада-спорт” “Көмүс мүһэ” бириэмийэтин хаһаайына.

         Александр Саввич олох оҕо эрдэҕиттэн, сүүрбэччэ сыл мас тардыһыытынан ылсан дьарыктана сылдьар, 2008 сыл уонна 2011 сылларга улууска сыл бастыҥ 10 спортсменын иһигэр киирбитэ. Кэргэнэ Анна Викторовна, сэттэ оҕо аҕата.