Иванов Егор Петрович 1955 с. ыам ыйын 3 к. Мэйик нэһилиэгэр төрөөбүтэ. Егор оҕо эрдэҕиттэн аҕатын удьуордаан буолуо, бөҕө-таҕа көрүҥнээх, саастыылаахтарыттан чорбойор сэниэлээх этэ. Кини ол иһин да буолуо, мас тардыһыытынан, гиирэ анньыытынан, хапсаҕай тустуунан тэҥинэн дьарыктаммыта.

         Егор аҕата Бүөтүр сэниэлээх, тустуук киһи этэ, олох хойукка дылы тустара уонна үксүн хототтуура. Егор спорт бу көрүҥнэринэн   бэйэтэ дьарыктаммыта уонна күрэхтэһиилэргэ ситиһиилээхтик кыттара. Егор Үөһээ Бүлүү улууһугар мас тардыһыытыгар, гиирэ анньыытыгар элбэх сыл бастаабыта.

         Егор 1995 с. Төҥүлүгэ ыытыллыбыт Манчаары Спартакиадатыгар мас тардыһыытыгар чемпион буолбута, 1999 с. республика чемпионатыгар II м ылбыта, 2011 с. III м буолбута. Хапсаҕайга 2008 с. Ньурбаҕа аатырбыт бөҕөс М.И. Васильев бирииһигэр чемпион буолбута, 2011 с. Бүлүү куоратыгар мас тардыытыгар II м, “Хотой Бииктэр” турнирыгар 1999, 2011 сс. II м, III м ылбыта, Кэрэ киһи уола Күүстээх Софрон бирииһигэр II м, А.А. Кузнецов бирииһигэр I м ылбыта, 2015 с. Бүлүү зонатын ветераннарын муҥутуур кыайыылааҕа буолбута.

         Егор Петрович САССР спордун маастара, СР спордун ветерана. Доруобуйата үчүгэй буолан билигин да үлэлиир. Уола Егор Иванов Саха сирин хапсаҕайга икки  төгүллээх чемпиона, Азия чемпиона, СР хапсаҕай тустууга Федерация түөрт төгүллээх хаһаайына, Чурапчытааҕы Манчаары Спартакиадатын II призера. Онон уоллуу-аҕа иккиэн Саха сирин спордун маастардара, төрөөбүт улуустарын чиэһин өрүү ситиһиилээхтик көмүскээбит спортсменнар