Кирилл Саввинов 1911 сыллааҕы төрүөх. Чүүккэ төрөөбүт-үөскээбит, үлэлээбит киһи. Колхозка биригэдьиирдээн сылдьыбыт.

         1966 с. Саха АССР национальнай оонньууларын V Спартакиадатыгар Дьокуускай куоракка мас тардыһыытыгар Кирилл Саввинов тоҕуста кыайан, иккитэ эрэ хотторон үһүс бириистээх миэстэҕэ тахсыбыта. Ол саҕана мас тардыһыыта ыйааһына суох абсолютнай чемпионат курдук ыытыллара. Кирилл иннигэр Петр Евсеев, Станислав Аракчеев эрэ түспүттэрэ. Кирилл Саввинов ити саҕана 55 саастааҕа. Ити туһунан “Кыым” хаһыат 1966 с. от ыйынааҕы биир нүөмэригэр Кирилл Саввинов мас тардыһа олорор хаартыскатын уонна кини туһунан ыстатыйаны бэчээттээбитэ. Хаартыска анныгар маннык суруллубут этэ: “Түһүлгэ саамай кырдьаҕас байыаһа, Үөһээ Бүлүү колхозтааҕа Кирилл Саввинов мас тардыһар”. Ыстатыйатыгар маннык суруллубут: “... Хата, дьоммун хомоппотум, син бириистээх миэстэҕэ таҕыстым. Чабыланнаҕа диэмэҥ, эдэрим буоллар, баҕар, бастыам да эбитэ буолуо. Армияҕа баран иһэн борохуокка биир олоххо 8-9 киһини субуруччу ыларым... Оччо улахан түмүгү ситиспэтэҕим үрдүнэн, спорт суута аналлаах бириис уонна мүһэ туттаран чиэстээбититтэн улаханнык үөрдүм. Онон туох да хомолтото суох, махталы кытта дойдулуубун”.

         Кирилл колхозтаах киһи быһыытынан спорду батан элбэхтик тиргиллибэтэх киһи этэ. Биирдэ эмэ мас тардыстаҕына киһини барытын кыайара. Кирилл Кэнтик киһитэ Лоҥсо уола Тэрэппииҥҥэ эрэ хоттороро үһү. Лоҥсо уола эмиэ Кирилл курдук икки метр үрдүктээх киһи этэ дииллэр. Кирилл муҥутаан сылдьан 100 кг тахса ыйааһыннааҕа. Сахалыы атах оонньоон Буоппал уола Федоров Сэмэҥҥэ эрэ хоттороро эбитэ үһү. Кирилл сүүрүүгэ эмиэ сыһыаннаах эбит. Сэрии кэнниттэн Давыдовка ыһыахха сүүрүү буолбут. Дьөгүөр Сортуолап (Ысыыт), Кучугур уонна Кирилл Саввинов сүүрбүттэр. Старт бэриллиитигэр Ысыыт уонна Кучугур Кириили икки өттүнэн турбуттар. “Чэ!” диэн хамаанданы кытта Кирилл икки утарсааччыларын икки илиитинэн икки аҥы илгитэлээн баран урут түспүт. Ол сүүрэн иһэн Кирилл обоччоҕо төбөтүн оройунан түһэн хотторбут.

         Армияҕа 1943 с. ыҥырыллыбыт, 1945 с. доруобуйатынан сыыйыллан кэлбит. Иркутскай уобаласка сулууспалаабыт. Биирдэ Нам уонна Үөдүгэй нэһилиэктэрин спортка табаарыстыы көрсүһүүлэригэр мас тардыһыытыгар Намҥа аатырбыт күүстээх тустуугу Бүөтүр Мутуукабы кыайбыт. Оҕонньор кыайан баран: “Өссө тардыһабыт дуо?” — диэбитин Бүөтүр аккаастаммыта үһү. Былыргы быраабыланан хотторбут киһи өссө тардыһарын көҥүллүүрэ буолуо.

         Кирилл Саввинов Өксүүн диэн кыыһыттан Василий Егоров диэн сиэннээх. Василий гиирэ көтөҕүүтүгэр ситиһиилэрдээх.

Колхозка тутууга үлэлии сылдьан Кирилл Саввинов улахан бэрэбинэни аҥар уһугуттан ылан баран соҕотоҕун чэпчэкитик эргитэлиир этэ диэн сөҕөн кэпсииллэр. Урукку үйэҕэ төрөөбүтэ буоллар күүһүн-уоҕун букатын көрдөрүө суох киһи, аныгы үйэни баттаһан, аҕыйах күрэхтэһиигэ кыттан Кирилл Саввинов аата историяҕа киирдэ диир сөп буолуо.

         Кини 1983 с. 72 сааһыгар өлбүтэ.