Мэйик нэһилиэгэр былыр былыргыттан биллэр, көстөр кус-быһый, ат бөҕө дьоннор төрөөн-үөскээн ааспыттара. Олору суоллаан, иистээн, удьуордаан кэлиҥҥи сүһүөх ыччакка сэниэлээх ыччаттар үөскүүр буоллулар. Саха АССР хапсаҕайдаһан тустууга бастакы абсолютнай чемпиона В.И.Степанов – Буучугурас бөҕөс аймаҕа анал үрдүк физкультурнай үөрэхтээх Санников Василий Петрович 1966 сыл атырдьах ыйын 2-с күнүгэр төрөөбүтэ. Санниковтар Ыгыалас аҕатын ууһа, нэһилиэк үтүөкэн үлэһит дьонноро курааҥҥа да ылларбат «Кутат», «Ойбон» − диэн ытык сирдэргэ олохсуйан сылдьыбыттара. Таайа Санников В.М. 60-с сылларга республикаҕа көҥүл тустуу саҥардыы сайдыытыгар спорт бу көрүҥүн көҕүлэспит, тустубут бөҕөһүнэн биллэр.

Василий оҕо сааһыттан атах оонньуутунан, сүүрүүнэн дьарыктанан барбыта. Дьиҥ айылҕата биэрбитинэн бэйэтэ бэйэтигэр сорук туруорунан эрчиллэрэ. Анал атах оонньуур кырдаллаах Чуолба алааска аатырбыт сымса, Куураа быһый таҥнары кумалааннаабыт тиитин анныгар эрчиллэн атах оонньуура, бу алааска эрчилиннэхпинэ этим-хааным уһуктар, дьикти сир диэн кэпсиирэ.

Атах оонньуутугар, сүүрүүгэ бэйэтин дистанциятыгар (5 км) улууска элбэхтик бастаабыта, республика чемпионатыгар ситиһиилээхтик кыттыталаабыта.

Атах оонньуутунан күүскэ дьарыктанан ситэн-хотон баран, спорт күүстээх көрүҥэр мас тардыһыытыгар барбыта. Кэккэ ситиһиилэр кини ветераҥҥа тахсар сааһыттан кэлэн барбыттара. Ол курдук, 2009 c. Дмитрий Никоноров бирииһигэр 65 кг II миэстэни, 2010 с. Бүлүүгэ Н. Каратаев бирииһигэр 75 кг I миэстэни ылаттаабыта.

Республика чемпионатыгар 2010 сылга 65 кг күүстээх састаапка III-с бириистээх миэстэҕэ тиксэн туруоруммут сыалын-соругун толору ситиспитэ, 2012 с. Cунтаарга  В. Николаев-Хотой Бииктэр бирииһигэр 75 кг III-с миэстэҕэ тахсыбыта, 2013 с. Ньурбаҕа С.Андреев-Кэрэ киһи бирииһигэр чемпионнаабыта, 2013 с. Бүлүүгэ Е. Евсеев бирииһигэр 65 кг III миэстэни ылбыта.

Василий Петрович 1998 сылга Тааттаҕа «Олоҥхо оонньуутугар» сүүрүүгэ 5 км республика бэртэрин кытта тэҥҥэ эриһэн Үөһээ Бүлүүтүн хамаандатын инники күөҥҥэ таһаарсыбыта, 2013 с. Чурапчыга Манчаары Баһылай XIX Спартакиадатыгар атах оонньуутугар ветераннарга кыттан үчүгэй түмүгү көрдөрбүтэ.

Үлэлиир оскуолатын улуустааҕы комплекснай Спартакиадаҕа өрүүтүн I миэстэҕэ илдьэ сылдьар физрук, нэһилиэгэр, улууһугар спорду өрө тута сылдьар, сааһырбытын биллэрбэт спорт энтузиаһа. Дьоһуннаах дьиэ кэргэн аҕа баһылыга олоҕун аргыһа Яна Саввичналыын үс оҕону күн сирин көрдөрөн, бар дьонноругар көмөлөһөн бар дьон махталын, тапталын ылбыт нэһилиэк сис ыаллара.