Таркаев Я.С. 1951 с. кулун тутар 17 к. Үөһээ Бүлүү улууһун Кэнтик нэһилиэгэр тимир ууһун дьиэ кэргэнигэр төрөөбүтэ. Аҕата Таркаев Савва Николаевич “Чап” уустарыттан төрүттээх аатырбыт тимир ууһа, рационализатор этэ. Кини Кэнтик оскуолатыгар аатырбыт Чап уустарын музейын тэрийиигэ саха уустара оҥорбут араас тимир экспонаттарын булуллууларыгар көмөлөспүтэ, онон музейга былыргы саха уустара оҥорбут чуор саалара, араас туттар тэриллэрэ, кыргыска туттуллар батыйалар, үҥүүлэр, ох саалар булуллубуттара. Ийэтэ Таркаева Варвара Михайловна Аҕа дойду сэриитин сылларыгар “Тулаайах” диэн сиргэ тимири уһаарыыга үлэлэспит, тыыл ветерана.

         Яков Саввич сопхуоска оробуочайынан үлэтин саҕалаабыта. Эдэриттэн тэрийээччи, көҕүлээччи буола улааппыта. Олоххо сыстаҕаһын, элбэх дьоҕурдааҕын таба көрөн Кэнтиккэ почта отделениетыгар маҥнайгы начальнигынан анаабыттара. Онтон кэлин оройуон киинигэр бытовой комбинакка көмүс ууһунан үлэлээбитэ, өр сылларга тимир ууһунан уонна көмүс киэргэллэри оҥоруунан дьарыктаммыта. Бу үлэтинэн 2012 с. Саха Республикатын норуотун маастарын аатын ылбыта.

         Яков Саввич оскуолаҕа үөрэнэр сылларыттан мас тардыһыытынан дьарыктаммыта, бэйэтэ эрчиллэн 1974 с. Ньурбаҕа ыытыллыбыт Бүлүү зонатын кыһыҥҥы Спартакиадатыгар 70 кг ыйааһыннаахтарга иккис миэстэ, 1975 с. Үөһээ Бүлүү оройуонун сайыҥҥы Спартакиадатыгар маҥнайгы миэстэни ылаттаабыта. Кини мас тардыспытын тухары саамай үрдүк ситиһиитинэн 1977 с. Манчаары Баһылай VI Спартакиадатыгар Мэҥэ-Хаҥаласка 70 кг ыйааһыннаахтарга үһүс миэстэни ылбыта буолар.

         Яков Саввич мас тардыһыытыгар ыйааһынынан арахсан күрэхтэһиилэр барар буолбуттарыгар оройуоҥҥа аан бастакынан Манчаары Спартакиадатын боруонса мэтээлин аҕалбыт спортсмен. Урукку өттүгэр ыйааһына суох мас тардыһыытыгар Ороһу ааттааҕа Егор Гольдеров, Үөдүгэйтэн Кириил Айаахап иккис, үһүс миэстэлэри Манчаары Спартакиадатыгар ылан турардаахтар.

         Яков Саввич гиирэ спордунан эмиэ дьарыктана сылдьыбыта, спорт бу көрүҥэр I разряд нуорматын холкутук толорбута.