Наталья Дмитриевна Үөһээ Бүлүү улууһун Өргүөт нэһилиэгэр 1991 с. Захаровтар дьиэ кэргэннэригэр күн сирин көрбүтэ.

         Абаҕалара аатырбыт бөҕөс, көҥүл тустууга ССРС спордун маастарыгар кандидат, хапсаҕайга САССР спордун маастара, оройуон 15 төгүллээх абсолютнай чемпиона Клавдий Захаров.

         Наталья 2008 с. оскуолатын ситиһиилээхтик үөрэнэн бүтэрэн, ХИФУ-га психолог идэтигэр үөрэнэ киирэр. Иккис кууруска үөрэнэ сылдьан 2009-2010 сс. хары баттаһыы (армрестлинг) күрэхтэһиитигэр холонон көрөн иккис миэстэни ылар. Наталья спорт бу көрүҥүнэн республика аҕыс төгүллээх чемпиона, Матвей Семенов салалтатынан харса суох дьарыктанан барар уонна республикаҕа икки төгүл бастыыр, 2012 с. Екатеринбург куоракка студеннар Россиятааҕы күрэхтэһиилэригэр 50 кг ыйааһыннаахтарга хаҥас илиинэн баттаһыыга үһүс миэстэни ылар, уҥа илиитигэр бэһис буолар. Наталья бу күрэхтэһииттэн санаата бөҕөргөөн, пауэрлифтинг диэн ыарахан көрүҥү сэҥээрэн утумнаахтык дьарыктанан барбыта.

         Наталья кэргэнэ Николай Черноградскай, бу көрүҥҥэ Россия спордун маастара, республика хас да төгүллээх чемпиона, Уһук Илин зонатын чемпиона, Саха сиригэр пауэрлифтинг Федерациятын Президенинэн үлэлээбит тренер утумнаахтык эрчийбитин түмүгэр үс ый иһинэн спорт маастарыгар кандидат нуорматын толоро охсубута, сылы кыайбатынан Уһук Илин зонатыгар чемпионнаан Россия спордун маастарын аатын ылбыта.

         Наталья пауэрлифтиҥы сэргэ быйылгыттан мас тардыһыытынан дьарыктанан республика чемпионатыгар кыттан үһүс миэстэни ылан Саха Республикатын маастарга кандидата буола оҕуста. Мас тардыһыытыгар кинини биллиилээх тренер Алексей Валерьевич Агапов эрчийэр. Наталья бу сыл олунньу ый 18-19 кк. Бороҕон сэлиэнньэтигэр ыытыллыбыт мас тардыһыытыгар республика чемпионатыгар кыттан 55 кг бастакы миэстэни ылла. Наталья Черноградская буолаары турар ХХ Манчаары Спартакиадатыгар төрөөбүт-үөскээбит Үөһээ Бүлүүтүн чиэһин мас тардыһыытыгар 55 кг көмүскээри дьарыгын үгэнигэр сылдьар.

         Наталья Дмитриевна иккис үөрэҕэр, юрист идэтигэр ситиһиилээхтик үөрэнэ сылдьар, уол оҕолоох.