Михайлов Еремей Варламович 1924 с. Үөһээ Бүлүү оройуонун Кэнтик нэһилиэгэр төрөөбүтэ. Кини эдэр сылдьан хапсаҕайга ситиһиилээхтик тустубута. Кэлин мотоциклынан күрэхтэһиилэргэ оройуоҥҥа тэҥнээҕин булбатаҕа.

1958 с. Ереме й Михайлов мотоциклынан кросска Саха АССР чемпионын үрдүк аатын ылбыта. Е.В. Михайлов сэрии ветерана, колхоз механига, рационализатор-механизатор. Еремей Варламович Михайлов сэрии иннинээҕи ыччаттар үгэстэринэн техниканы баһылыырга дьулуспута. Кылгас болдьохтоох курска үөрэнээт кини тракторист буолбута уонна сир солооһунугар үлэлээн барбыта. Кыракый, онно-манна оҥолох-чоҥолох бытана сытар бааһыналары улаатыннарарга, кэҥэтэргэ дьүккүөрдээхтик үлэлээн, колхоһа сыл иһигэр бурдук үүнүүтүн үрдэтэригэр көмөлөспүт Еремей Михайлов оччолорго даҕаны оройуонугар лаппа биллэр үлэһит буолбута. Кини 18 сааһын сиирэ-халты туолуутугар сэрии буолбута. Онон ытык иэһин толоро сэриигэ тылланан барбыта. Бастаан Забайкальскай байыаннай уокурукка үөрэнэн 1 №-дээх пулеметчик буолан фроҥҥа киирбитэ. Лодзь куораты штурмалааһын кырыктаах кыргыһыытыгар бастакы сүрэхтэниини ылбыта. Онно командира Еремей Михайлов хорсуннук сэриилэспитин ордук чорботон бэлиэтээбитэ. Ити көрдөрбүт хорсун быһыытын иһин кини “Хорсунун иһин” медалынан наҕараадаламмыта. Ол бастакы хайҕаныы, наҕараада кэннэ Еремей Варламович сэриини Берлиҥҥэ тиийэн түмүктээбитэ. Сэрииттэн “Кыһыл Сулус” орденнаах, икки “Хорсунун иһин”, “Берлини ылыы иһин”,  “Германияны кыайыы иһин” медаллардаах эргиллэн кэлэн баран, айгыраабыт олоҕу чөлүгэр түһэрии түбүктээх үлэтигэр төбөтүн оройунан түспүтэ.

Еремей Варламович холкуос, совхоз хаһаайыстыбаларыгар механизаторынан, механигынан өр сылларга үтүө суобастаахтык, айымньылаахтык үлэлээбитэ. Кини айбыт михайловскай оһохторо, сыарҕалара бүтүн Саха сирин үрдүнэн туһаныллыбыттара.

Еремей Варламович САССР норуотун хаһаайыстыбатын үтүөлээх үлэһитэ, Үөдүгэй, Кэнтик нэһилиэктэрин бочуоттаах гражданина, тыа хаһаайыстыбатын ветерана. Еремей Варламович 2001 с. ыалдьан өлбүтэ.