Классоводунан үлэлии сылдьаммын ытыктыыр киһибин Дмитрий Яковлевич Федотовы көрсөн сахалыы остуол оонньууларын туһунан кылаас чааһын ыытарыгар көрдөспүппүн үөрүүнэн кэлэн ыыппыта. Илдьэ кэлбит араас материалтан оҥорторбут хаамыскаларын көрдөртөөн, бэйэтэ оонньоон улахан интэриэһи тарпыта. Ити кылаас чааһыгар атын кылаас оҕолоруттан эмиэ киллэрбитим. Ол оҕолор истэригэр Тамерлан эмиэ баара, хараҕа уоттаммытын онно бэлиэтии көрбүтүм. Дмитрий Яковлевич миигин “оҕолору эн хомуйан дьарыктаа, быраабылата маннык” диэн үчүгэйдик көрдөрбүтэ. Сатаабаппын, оҕо сылдьан эрэ оонньуур этим диэбиппин, оҕолорго үөрэтэргэ сатыыр наадата суох, интэриэстээх, баҕалаах оҕолору хомуйан дьарыктыыр эрэ наада диэн олох тылыгар киллэрэн кэбиспитэ. Донской А.И. кинигэтин булан аахпытым, “Модунтан” Белолюбская Н.Н. көмө материал биэрэн абыраабыта.

Ити кэмҥэ биһиги оскуолабыт үөрэнээччилэрэ агрооскуолалар республикатааҕы «Өбүгэ оонньуулара» фестивальга кытталлар этэ. Республика таһымыгар күрэхтэһиилэр саҥа ыытыллан эрэллэр. Аан бастаан Абрахов Толя, Попов Алик, Никутова Ира, Махаров Тамерлан, Нюкканова Настя дьарыктанан киирэн барбыттара, “Өбүгэ оонньууларыгар” ситиһиилээхтик кыттан, онтон тирэх ылан дьаныардаахтык дьарыктанан барбыттара. Тамерлан олох күүскэ дьарыктанара.

Тамерлан элбэх оҕолооох Махаровтар дьиэ кэргэннэрин улахан оҕото. Ийэтэ Мария Александровна оскуолаҕа омук тылын учууталынан үлэлиир, аҕата Альберт Иванович рабочайдыыр.

2013 с. саас СР чемпионатыгар кытта бардыбыт. Хамаандабытыгар кыра уола суохпут, хамаандабыт итэҕэс диэн буолла. Тамерлан мин быраатым оонньуур ээ диэтэ. Мин Дмитрий Яковлевичка «Алешаны аҕалтарабын дуо?”—  диэтим. Сарсын сарсыарда күрэхтэһиибит буолар, чаһыыбыт 11 чаас буолан эрэр. Дмитрий Яковлевич наһаа соһуйда: “Ол Үөһээ Бүлүүттэн дуо” — диир. “Дьэ аҕалтар эрэ” диэн буолла. Сразу таксига звоннааттым, такси тахсан иһэр диэн буолла. Мария Александровнаҕа звоннаатым, “Алешабыт килиэп ыла барбыта” — диир. “Килиэпкитин бэйэҕит ылыҥ, сибилигин такси иһэр, ыыта охсуҥ” — диэн буолла. Дьэ түргэн үлүгэрдик массыынаҕа уган ыыта оҕустулар. Уолбут сарсыарда баар буолла. Дмитрий Яковлевич миигин: “Люба, соһуйуом иһин дьэ сүрдээх киһи эбиккин” — диир, мин хайҕал ылаары турбут киһи: «Айыы, хайдах?” — диэтэҕим дии.  “Бу ыал иккис оҕотун бачча түргэнник тылгар киллэрэ охсон Үөһээ Бүлүүттэн баар гына охсор” — диэн баран төбөтүн быһа илгистибитэ. Онон улуус хамаандата толору буолбута. Алеша бастакы сүрэхтэниитин республикаттан саҕалаабыта. Алешаҕа улуус эҥин күрэхтэһиитэ наадата суох, тута республикаттан саҕалыыр диэн күлсүү бөҕө буоллубут.

Тамерлан бу чемпионакка бастакы миэстэни ылбыта уонна анал бирииһинэн наҕараадаланан үөрүү бөҕө буоллубут. Амма, Таатта улууһун хамаандаларын салайааччылара ыҥыран мастер-класс оҥоттордулар.

Мантан ыла Тамерлан аата республикаҕа биллэр буолбута. Дьарыктанар оҕолорум элбээн бардылар, улуус Спартакиадатыгар миэстэлэһэр буоллубут.

2013 с. улууска остуол оонньууларын пропагандиһа, учуутал Григорьева У.В. кэриэһигэр Харбалаахха ыытыллыбыт республиканскай аһаҕас турнирга 1 миэстэни Махаров Тамерлан ылбыта.

Оҕолорум оонньуур маастарыстыбаларын үрдэтээри улуустан Варламова Т.К. аҕалан оҕолорбун эбии дьарыктатар буолбутум. Тамерлантан сөҕөрүм диэн баар, кини кып-кыра да миэстэни булан дьарыктана олорор буолар. Аны сыыстаҕына ыксаабат, төттөрүтүн өссө хомуллан салгыы күүскэ оонньоон барар.

Тамерлан  ити курдук оонньоон 2014 с. Саха Республикатын сахалыы остуол оонньууларыгар “хабылыкка, хаамыскаҕа” улууска оскуола оҕолоругар бастакыннан маастар буолбута.

Тамерлан 2015 с. Сунтаарга Богодоева бирииһигэр абсолютнай чемпион, Уус- Алдаҥҥа Найахыга ыытылллыбыт күрэхтэһиигэ II призер, республика чемпионатыгар чемпион уонна абсолютнай кыайыылаах буолбута, бу ситиһиитин 2016 с. хатылаабыта.

2013.2014.2015.2016 сс. улуустааҕы  хабылык, хаамыска курэхтэрин кыайыылааҕа уонна призера буолбута.

Тамерлан 2016- 2017 үөрэх сылыгар Бүлүүтээҕи педколледжка үөрэнэ киирбитэ. Колледжка ыытыллыбыт күрэхтэһиигэ бастаабыта, орто үөрэхтээһин тэрилтэлэригэр ыытыллыбыт күрэхтэһиигэ бастаабыта уонна республика чемпионатыгар кыттан Манчаарыы ХХ Спартакиадатыгар  кыттарга путевка ылан дьарыктана сылдьар.

Алеша Махаров иккис кылааска үөрэниэҕиттэн дьарыктанан бэрт элбэх ситиһиилэннэ.2013 с. Григорьева У.В. бирииһигэр ыытыллыбыт турнирга начальнай кылаас оҕолоругар 1 миэстэни ылбыта, 2014 с. А.И.Донской кэриэһигэр ыытыллыбыт турнирга 3 миэстэҕэ тахсыбыта, “Өбүгэ оонньууларыгар” баран хабылыкка, хаамыскаҕа 1 миэстэни ылбыта. Улууска ыытыллыбыт элбэх күрэхтэр кыайыылааҕа уонна призера.

2015-16 үөрэх дьлыгар улууска ыытыллыбыт Спартакиадаҕа чемпионнаабыта, Сунтаарга Богодоева бирииһигэр республиканскай күрэхтэһиигэ 2 миэстэни ылбыта. Алеша республикатааҕы “Өбүгэ оонньууларыгар”  үс көрүҥҥэ 1 миэстэни ылбыта, тутум эргииргэ 2 мүнүүтэҕэ 77 эргийэн рекорд олохтообута.

2016-17 үөрэх дьылыгар Дьокуускайга ыытыллыбыт республикатааҕы аһаҕас турнирга чемпионнаабыта, улуус комплекснай Спартакиадатыгар кыайбыта,  республикатааҕы “Өбүгэ оонньууларыгар” 4 көрүҥҥэ 1 миэстэни ылан муҥутуур кыайыылаах буолбута, Уус-Алдаҥҥа баран күрэхтэһэн 1 миэстэни ылбыта,  республикатааҕы чемпионакка хаамыскаҕа икки мүнүүтэҕэ 52 очкону ылан рекорд олохтообута, Манчаары ХХ Спартакиадатыгар кыттар путевканы чиэстээхтик ылла, спорт маастарын нуорматын толордо.

Алеша дэгиттэр спортсмен. Тустар, теннистиир, хайыһардыыр, боксанан дьарыктанар, сахалыы көрүҥнэргэ: тутум эргиигэ, көтөх ынаҕы туруорууга, ойбонтон уулааһыҥҥа үчүгэй көрдөрүүлэрдээх.

Бииргэ төрөөбүттэрэ Милена Махарова эмиэ ситиһиилэрдээх. Милена Манчаары ХХ Спартакиадатыгар орто үөрэх тэрилтэлэриттэн киирэр путевканы ылла.

Билигин  Акимова Мичийэ, Павлова Надя, Васильев Аял, Васильева Вика, Нюкканова Настя араас таһымнаах күрэхтэһиилэргэ кытыннылар уонна ситиһиилэрдээхтэр.

Нам нэһилиэгэр хабылык, хаамыска күннэрин ыытан эмиэ биир сэргэх тэрээһини ыыттыбыт.

Бу өбүгэлэрбит оонньуулара спорт көрүҥүнэн билиниллибитэ ону ааһан ХХ Манчаары Спартакиадатыгар көрүҥ быһыытынан киирбитэ үөрдэр. Өбүгэлэрбит барахсаттар мындырдарын, киһи уйулҕатын, этин-сиинин алыс алдьаппакка эрэ күөн көрсөр оонньуулаахтарыттан сөҕөҕүн эрэ. Хабылык, хаамыска оонньуулара сымса, болҕомтолоох, тирэхтээх, толкуйдаах буолууну ирдиир.

Любовь Сидорова остуол оонньуутун энтузиаһа,

СР үөрэҕириитин туйгуна, бочуоттаах ветерана