Марианна Васильевна сахалыы остуол оонньууларынан: хабылык, хаамыска көрүҥнэринэн Үөһээ Бүлүүтээҕи аҕыс кылаастаах оскуолаҕа алтыс кылааска үөрэнэ сылдьан дьарыктанан саҕалаабыта. Онтон ылата тренеринэн СР культуратын үтүөлээх үлэһитэ, СР үөрэҕириитин туйгуна, спорт  ветерана, спорт маастара, Манчаары Спартакиадатын төрүттээччилэртэн биирдэстэрэ, норуот уус-уран айымньытын, сахалыы остуол оонньууларын, оһуохайы үйэтитээччи Дмитрий Яковлевич Федотов салалтатынан дьарыктаммыта. Ситимнээх үлэ, тренерин сыаналаммат сүбэлэрэ спортка ситиһиилэнэригэр сүрүн тирэх буолбута. Марианнаҕа спорт көрүҥүнэн дьарыктанарыгар оскуола сылларыттан төрөппүттэрэ өйөөн, өйдөөн тренерин кытта ыкса сибээстээхтик сыал-сорук туруорунан эрчиллэригэр төһүү күүс буолбуттара саарбаҕа суох. Кини өй-санаа, эт-хаан өттүнэн сайдан үрдүк ситиһиилэри ситиспитэ. Ол курдук, Марианна оскуолаҕа, улууска, республикаҕа ыытыллар күрэхтэһиилэргэ үрдүк ситиһиилэрэ дьонун-сэргэтин үөрдүбүтэ. Марианна бэйэтин кытта балтын, быраатын кыра кылаастартан дьарыктаан, спорт бу көрүҥүн сэҥээрэн эрчиллэллэригэр үтүө холобур буолбута. Сахалыы остуол оонньууларын дьарыктара 2009 с. Үөдүгэйдээҕи сынньалаҥ киинигэр кииннэнэн нэдиэлэҕэ иккитэ, онтон күрэхтэһии, сбор чугаһаатаҕына күҥҥэ иккилиитэ дьарыктаналлара. Оҕолор бэйэ-бэйэлэрин икки ардыгар күрэхтэһэн нэһилиэк, улуус, зона күрэхтэригэр кыттан республикаҕа үрдүк ситиһиилэри ылбыттара, оҕо эрдэхтэриттэн тэҥҥэ бииргэ дьарыктаммыттара. Билигин кинилэртэн сахалыы остуол оонньууларын республикаҕа биллэр спортсменнара, спорт маастардара Егорова Надя, Варламова Туяра сахалыы остуол оонньууларыгар тренердэрэ, Алена Михайлова, Терентьев Коля эмиэ ыччаттары уһуйаллар, билигин бары улуус сборнай хамаандатыгар киирэн күрэхтэһиилэргэ улууспут чиэһин көмүскүүллэр.

Марианна Валериевна элбэх күрэхтэһиилэргэ оҕолорго бастаан 1999 с. Тааттаҕа Ытык-Күөлгэ ыытыллыбыт ХVI Манчаары Спартакиадатыгар хабылыкка, хаамыскаҕа кыргыттарга абсолютнай чемпион буолбута уонна СР спорт маастарын нуорматын толорбута. Ол ситиһиититтэн тренерэ Д.Я. Федотов олус үөрэн, астына ахтар этэ.

2000 с. Марианна уон сэттэ саастааҕар сахалыы остуол оонньууларыгар бастакы маастардарын Д.Я. Федотовы, Алена Федорованы кытта тэҥҥэ СР спордун маастара буолбута.

Утумнаах,  дьаныардаах дьарык, тус режим кинилэри спортсмен быһыытынан бэрээдэктээбитэ уонна республикаҕа сахалыы остуол оонньууларын лидердэригэр таһаарбыта. Үөһээ Бүлүү улууһун сахалыы остуол оонньууларын хамаандатын тренер Д.Я.  Федотов дьаныарынан спорт бу көрүҥэ Манчаары Спартакиадатыгар, “Өбүгэлэр оонньууларын” Спартакиадатыгар спортивнай күрэх көрүҥүн быһыытынан сэмэй да буоллар тус кылааттаахтарыттан биир дойдулаахтара астынабыт.

Күн бүгүн улуус спортка управлениета (салайааччы Николаев Е.А.) анал специалист тутан, спорт бу көрүҥэр болҕомто ууруллан үрдүктэн үрдүк ситиһиилэргэ дабайабыт. Билигин улуус хамаандатын Т.К. Варламова салайан үбүлүөйдээх Манчаары Спартакиадатыгар ситиһиилээхтик кыттардыы бэлэмнэнэллэр, түмсэллэр.