Наталья Григорьевна 1956 с. Үөһээ Бүлүү оройуонугар төрөөбүтэ. Кини остуол тенниһинэн Кэнтик оскуолатыгар үөрэнэ сылдьан оонньуур буолбута, онтон салгыы Үөһээ Бүлүүтээҕи Исидор Барахов аатынан орто оскуолаҕа үөрэнэр сылларыгар утумнаахтык дьарыктаммыта.

         Наталья Григорьевна 1978-2009 сс. остуол тенниһигэр 12 сыл устата бастаабыта, Бүлүү улууһугар 1999, 2008 сс. бастакы, 2005 с. иккис буолуталаабыта, Ньурба улууһугар 2009 с. чемпионнаабыта. 2009 с. Саха Республикатын норуоттарын спортивнай оонньууларыгар зонатааҕы сүүмэрдиир оонньууларга II призер буолбута.

         Наталья Григорьевна Бүлүү зонатыгар 1998, 2004, 2005, 2006, 2009, 2011 сс. чемпион уонна абсолютнай чемпион ааттарын ылбыта, Окоемов бирииһигэр ыытыллар республиканскай турнирдарга 1997, 2006, 2011 сс. бастаабыта, 2009 уонна 2011 сс. II, III миэстэлэри ылбыта. Республика “Урожай” ДСО чемпионатыгар 1978, 1980, 1981 сс. бастаабыта, 1979 уонна 1982 сылларга иккис, үһүс буолбута. Ааспыт, 2016 с., Ольга Калачикова бирииһигэр 60 саастаахтарга III миэстэни ылбыта.

         Наталья Григорьевна кооперативнай техникуму үөрэнэн бүтэрэн баран Үөһээ Бүлүү райпотребсоюһугар, “Кустук” обществоҕа эҥкилэ суох, таһаарыылаахтык үлэлээбитэ, 1986 с. “Бочуот бэлиэтэ” орденынан наҕараадаламмыта, атыы-эргиэн уонна спорт ветерана, билигин бочуоттаах сынньалаҥҥа Дьокуускай куоракка олорор.