Борис Степанович 1945 с. муус устар 6 к. Сунтаар оройуонун Элгээйи диэн Бүлүү эбэ хотуну өҥөйөн турар дэриэбинэҕэ күн сирин көрбүтэ. Ийэлэрэ барахсан 7 оҕону төрөтөн баран эдэр сааһыгар олохтон бараахтаабыта, ону Борис оччо-бачча өйдөөбөт даҕаны. Онтон икки уол утуу-субуу сэрии кэннинээҕи аас-туор олох кэмэ буолан бу орто дойдуттан барбыттара, онон биэс уол соҕотох аҕа илиитигэр хаалбыттара. Сэбиэскэй кэм буолан үс уол Бордоҥ, Тойбохой детдомнарыгар иитиллэн киһи-хара буолбуттара.

Кэлин ытык иэһин төлөөн Чуумпу Акыйааннааҕы Байыаннай Муоратааҕы Флокка  подводнай лодкаҕа 4 сыл эҥкилэ суох сулууспалаан кэлбитэ. Элбэх командование биһирэбилин ылан, Чуумпу Акыйааннааҕы Флот хаһыатыгар, онтон сиэттэрэн Саха сирин хаһыаттарыгар тахса сылдьыбыта.

Борис Степанович 1976 сылтан Үөһээ Бүлүүнү иккис дойду оҥостон, лесохранаҕа үлэлээн пенсиялаҕа тахсыбыта. Урут оскуолаҕа үөрэнэ сылдьан Сунтаарга оройуон чемпиона буолбут таптыыр дьарыгын, остуол тенниһин оонньуутун күөдьүтэн Үөһээ Бүлүүгэ улахан үтүөлээх-өҥөлөөх киһи буолар.

Борис теннискэ оройуон 6 төгүллээх абсолютнай чемпиона, Бүлүү зонатын элбэх төгүллээх призера.

Борис “Урожай” общество республиканскай чемпионатыгар төрдүс буолан оройуон 10 бастыҥ спортсменын кэккэтигэр киирэн турардаах. Ленскэйгэ Х Саха сирин норуоттарын Спартакиадатыгар хамаанданан күрэххэ Борис, Осипов Александр, Наталья Дмитриева, Саввинова Клава буолан 4-с миэстэҕэ тахсыылара ол кэмҥэ улахан ситиһии этэ.

Борис оройуон тэрилтэлэринэн күрэхтэһиилэригэр райсоюзтар хамаандаларыгар оонньоон түөрт Бүлүү кооператордарын аҕыс төгүллээх чемпиона буолбута, “Холбос” систематын республиканскай күрэхтэһиитигэр иккитэ бастаабыта, элбэх үлэни, көлөһүнү тоҕон бастакы разряды толорбута. Олох хойукка дылы оонньуур баҕалаах этэ да кэнники массыына авариятыгар түбэһэн эчэйэн таптыыр дьарыгын быраҕарга күһэллибитэ. Ол да буоллар билигин да спорт атын көрүҥэр эрчиллэн, бильярд курдук кыраҕы хараҕы, хамсаабат илиини, өйү-санааны эрэйэр спорт көрүҥэр син кэккэ ситиһиилэрдээх оонньуу сылдьар.

Кэргэнинээн Иванова Александра Егоровналыын сэттэ оҕолоохтор, 10 сиэннээхтэр. Сэттэ оҕоттон кыра уола Саша теннискэ арыый ылсыах курдук этэ, оройуоҥҥа, Бүлүү зонатыгар бастаталаан сылдьыбыта, ол эрэн тустууга охтон хаалан олох да бырахпыта.

Дьон этээччилэр: “Бу Барыыс бэйэтэ оонньуур да, оҕолорун эрчийбэт” — диэн. Тренер диэн олох атын эйгэлээх, туспа санаалаах-оноолоох киһи буолар. Ол курдук  Тамалакааҥҥа Федотов Владимир, Үөһээ Бүлүүгэ Ф.Ф. Неустроев курдук, оҕону үөрэтэргэ-такайарга туспа талааннаах дьон сатаан оҕону эрчийэллэр.

Билигин теннис биһиги улууска лаппа сайынна, түөрт маастарга кандидат үүнэн тахсыбытын Борис Степанович бу спорду күөдьүппүт, иккис тыын укпут киһи быһыытынан истэ-истэ үөрэр.

Борис Степанович өр сылларга оройуон чиэһин көмүскээн элбэх сири кэрийэн, республика хайа да муннугар тиийдэҕинэ билсэр-көрсөр дьоннордоох, спорт эйгэтэ киниэхэ туһатын этэ да барыллыбат.

Спорт диэн киһи олоҕор сүҥкэн үөрүүнү, дуоһуйууну, буһууну-хатыыны аҕалар сүдү суолталааҕын Борис Степанович этинэн-хаанынан билбит киһи.