Михаил Иванович Ан 1944 сыллаахха Дүллүкү нэһилиэгин Тэһэкэй диэн алааһыгар төрөөбүтэ.

         Михаил олох кыра сааһыттан оҕуруот үлэтигэр буһан-хатан, хары үлэтигэр чахчы күүскэ эриллэн улааппыта. Ол да иһин үөлээннээхтэриттэн эт-хаан өттүнэн ураты сайдыылааҕа. Орто оскуоланы Дьокуускай куорат 2-с нүөмэрдээх оскуолатыгар бүтэрбитэ. Оскуола кэнниттэн Ленин аатынан колхозка производствоҕа үлэлии тахсыбыта. Маҥнай МТЗ-5 диэн “Беларусь” тракторга үлэлээбитэ, онтон колхоз правлениетынан хонуу биригэдьииринэн анаммыта.

         1965 с. СГУ тыа хаһаайыстыбатын факультетыгар үөрэнэ киирбитэ уонна 1970 с. учуонай-зоотехник дипломун ылбыта. Университетка үөрэнэр сылларыгар атах оонньуутугар В.П. Кочневка дьарыктаммыта. Михаил Иванович айылҕаттан талааннаах буолан атах оонньуутугар түргэнник маастар буолбута.

         Университетка үөрэнэ сылдьан Үөһээ-Халыматтан төрүттээх А.С. Бандерованы кытта ыал буолбуттара. Оҕолоро Михаил, Сергей, Иван Үөһээ-Халыманан, Дьокуускайынан олороллор, үлэлииллэр, сиэннэри, хос сиэннэри бэлэхтээтилэр. Михаил Иванович бэйэтэ сир үрдүгэр баара-суоҕа 36 эрэ сыл олорон ааспыта.