Дэгиттэр спортсмен Петр Афанасьев

         Петр Иванович Афанасьев 1965 с. Дүллүкү нэһилиэгэр элбэх оҕолоох ыалга төрөөбүтэ. Аҕалара Иван Егорович үйэтин тухары механизатор, ийэлэрэ Анна Григорьевна – атыыһыт. Бу ыал оҕолоро үгүстэрэ үрдүк үөрэҕи ылбыттара. Петр үрдүк үөрэхтээх тутуу инженерэ. Кини кыра эрдэҕиттэн спордунан дьарыктаммыта. Ол курдук 800, 1000 уонна 1500 м дистанцияларга сүүрүүгэ, ону кытта атах оонньуутугар оройуон элбэх төгүллээх чемпиона. “Коммунизм сардаҥата”, “Үөһээ Бүлүү” хаһыат сүүрүүгэ эстафетатыгар Дүллүкү нэһилиэгин хамаандатыгар бастыҥнара буолара. Покровскайга 1989 сыллаахха буолбут чэпчэки атлетикаҕа республика чемпионатыгар 800 м сүүрүүгэ үһүс миэстэлээх.

         1993 сыллаахха Покровскайга ыытыллыбыт XIII Манчаары спартакиадатыгар сахалыы многоборьеҕа кыттыбыта. Онно тутум эргииргэ 100 эргиири оҥорон 1-2 миэстэни ылбыта, “үс төгүл үскэ” 3 миэстэ буолбута. Кини Төҥүлүгэ, Ньурбаҕа, Ытык Күөлгэ уонна Бүлүүгэ буолбут Манчаары оонньууларыгар атах оонньуутугар түөртэ улууһун чиэһин көмүскээбитэ. Петр бастыҥ көрдөрүүлэрэ: кылыыга 39 м 30 см, ыстаҥаҕа 38 м 70 см, куобахха 34 м 55 см.

         Петр Иванович билигин Дьокуускайга олорор, үлэлиир. Кэргэнэ Анна Евгеньевналыын икки уоллаахтар. Улахан уоллара Петя IV “Азия Оҕолоро” спортивнай оонньууларыгар атах оонньуутугар 4 миэстэ буолбута. Бу уол Бүлүүгэ буолбут Манчаары оонньууларыгар 18 саастаахтарга атах оонньуутугар ситиһиилээхтик кыттыбыта. Кини билигин бэйэтэ ыал аҕата. Кыра уоллара Леня тренер Д. Наумовка чэпчэки атлетикаҕа, атах оонньуутугар эрчиллэр.