Атах оонньуутугар спорт маастара Догуев Василий Васильевич 1959 сыллаахха олунньу 21  күнүгэр Үөһээ-Бүлүү улууһун Мэйик нэһилиэгэр төрөөбүтэ. 1966 сыллаахха Мэйик оскуолатыгар киирбитэ. Хоро орто оскуолатыгар  9-с кылааска үөрэнэ сылдьан оройуон күрэхтэһиилэригэр көҥүл тустууга 2 миэстэни, хапсаҕайга 3 миэстэни ылбыта. 1976 сыллаахха  орто оскуоланы ситиһиилээхтик  бүтэрэн баран Мэйик нэһилиэгин Маай учаастагар “Эрэл-75” хотоҥҥо субай сүөһү көрүүтүгэр үлэлээбитэ. “Үөһээ-Бүлүү” совхозка ыччаттарга бастаан норуоттар икки ардыларынааҕы лааҕырга сынньанар путевканан  наҕараадаламмыта. 1977-79 сылларга Советскай Армия кэккэтигэр сулууспалаабыта. 1981-83 сылларга ЯПУ-1 физкультурнай отделениетын ситиһиилээхтик үөрэнэн бүтэрбитэ. Саха АССР үтүөлээх тренерэ Прокопий Готовцевка атах оонньуутугар эрчиллибитэ. Үөрэнэ сылдьан атах оонньуутугар ЯПУ чемпиона.

- 1982 сыллааҕы Нам Үөдэйин, Хаҥалас Нөмүгүтүн  ыһыахтарын атах оонньуутугар абсолютнай, хапсаҕайга 60 кг диэри чемпионнара.

- 1983 сыллаахха Дьокуускай куорат хамаандатын Манчаары спартакиадатыгар сүүмэрдиир күрэхтэһиитэ Хатаска ыытыллыбытыгар атах оонньуутугар уонна хапсаҕайга  60 кг иккис миэстэлэри ылаттаабыта.

- 1983 сыллааха Майаҕа Манчаары оонньууларыгар атах оонньуутугар Саха сирин маастарын нуорматын толорбута, кылыыга финалга тахсан 41 м 28 см ыстанан 5-с көрдөрүүлэммитэ.

- 1983-1984 сылларга Уус Алдан Тандатыгар физкультура учууталынан үлэлээбитэ.

- 1984 сыллаахха Намҥа республика тыатын сирин оонньууларыгар Уус Алдан сүүмэрдэммит хамаандатыттан кыттыбыта.

- 1985-1990 сылларга  Хороҕо “Үөһээ-Бүлүү” совхоз спорт инструктора.

- 1985-1990 сылларга Үөһээ Бүлүү сүүмэрдэммит хамаандатын чилиэнэ, атах оонньуутугар, волейболга, 100 м сүүрүүгэ оройуон чемпиона.

- Оройуон чиэһин атах оонньуутугар 1985 сыллаахха Бүлүүгэ, 1989 сыллаахха Аммаҕа Манчаары оонньууларыгар көмүскээбитэ.

- 1999 сыллаахха Тааттаҕа Олонхо оонньууларыгар спорт национальнай көрүҥнэригэр, 2009 сыллаахха Бүлүүгэ буолбут Манчаары оонньууларыгар судьуйалаабыта.

Хабаровскай педагогическай институтун физкультура отделениетын 1991сыллаахха кэтэхтэн үөрэнэн бүтэрбитэ.

1991-2007 сылларга ИДьМ УФСИН систематыгар оперативнай үлэҕэ үлэлиир. Билигин отставкаҕа олорор подполковник. Кэргэннээх, икки оҕолоох.