Атах оонньуутугар РСФСР спордун маастара Константин Иванов 1963 сыл сэтинньи ый 18 күнүгэр Үөһээ Бүлүү сэлиэнньэтигэр үс оҕолоох ыал иккис оҕотунан төрөөбүтэ. Ийэтэ – Зинаида Константиновна Иванова – саха тылын учуутала этэ. Төрөппүт аҕата, биллиилээх хайыһардьыт Иванов Иван Николаевич (Кылгас Сис) оройуон аатын спорт араас көрүҥнэригэр саамай элбэхтик көмүскээбит дьоннортон биирдэстэрэ буолар.

Кини 1971 сыллаахха И. Барахов аатынан орто оскуолаҕа маҥнайгы кылааска үөрэнэ киирбитэ. Физкультура учууталлара Зоя Васильевна уонна Дмитрий Герасимович Тарабукиннар уһуйууларынан Костя кыра кылаастарга үөрэниэҕиттэн сүүрүүнэн, уһуну ыстаныынан дьарыктаммыта.

1974 сыллаахха Үөһээ Бүлүүтээҕи 2-с №-дээх физмат оскуола арыллыбытыгар онно көспүтэ. Улахан кылаастарга сылдьан Костя волейболунан, баскетболунан үлүһүйбүтэ. Маны таһынан атах оонньуутугар туох да секция, тренер суоҕун үрдүнэн, бииргэ үөрэнэр уолаттарын угуйан оскуола кыра куорпуһун көрүдүөрүгэр дьарыктаммыттара. Онно кинини кытта Ленскэй Бэтинчэтитэн сылдьар Гермогенов Миша уонна Кэбээйи Мукучутуттан кэлбит Павлов Степа ордук элбэхтик эрчиллибиттэрэ. Күһүн уолаттар спорт сахалыы национальнай көрүҥнэригэр Буучугурас бирииһигэр күрэхтэһиилэргэ кытталлара. Ол турнир атах оонньуутугар күрэхтэһиитэ “Үөдүгэй” сопхуос хонтуоратын көрүдүөрүгэр ыытыллара. Оттон саас Кыайыы күнүгэр паарка стадионугар спорт сахалыы оонньууларыгар күрэхтэһиилэр тэриллэллэрэ. 1981 сыл сааһыгар, онус кылааһы бүтэрээри сылдьан, оҕолорго оройуоҥҥа Костя кылыыга, Миша куобахха, Барахов аатынан оскуола үөрэнээччитэ Сергей Гаврильев ыстаҥаҕа, Степа уопсай түмүккэ бастаабыттара. Ити сыл сайыныгар Костя Майаҕа Баһылай Манчаары VIII Спартакиадатыгар атах оонньуутугар оҕолорго үһүс призер буолан аан маҥнай улахан ситиһиилэммитэ, салгыы Бүлүү зонатыгар уолаттарга абсолютнай чемпион буолбута.

Константин СГУ педагогическэй факультетын физкультурнай салаатын бүтэрбитэ. Атах оонньуутугар үрдүк үөрэх кыһаларын хас да төгүллээх призера.

Аармыйаҕа хойут соҕус ыҥырыллыбыта да  буоллар, ситиһилээхтик ытык иэһин толорон кэлбитэ.

Константин Иванович Таатта улууһун Харбалааҕыгар орто оскуолаҕа, Дьокуускай куорат 9-с №-дээх оскуолатыгар, Мирнэй оройуонугар, Дьокуускайдааҕы художественнай училищеҕа физкультура учууталынан үлэлээбитэ.

Костя 1990 сыллаахха футболга Үөһээ Бүлүү хамаандатын састаабыгар киирэн Саха АССР тыатын сирин улуустарын чемпионатыгар оонньоон “Бастыҥ гол киллэрээччи” ааты ылбыта. Бу тыҥааһыннаах күрэхтэһиигэ биһиги хамаандабыт хаһааҥҥытааҕар да ситиһиилээхтик кыттыбыта. Ити саас Костя улахан оһолго түбэспитэ. Улахан хараахтырын көрдөрөн чөлүгэр сыыйа, уһуннук киирбитэ. Ити кэмҥэ киниэхэ эрдэ толорбут атах оонньуутугар РСФСР спордун маастарын аатын иҥэрбиттэрэ.

Костя 2000 сыллаахха доҕорун көрдөһүүтүнэн Өлөөн улууһун хамаандатын састаабыгар киирэн республикаҕа Хотугу зона улуустарыгар атах оонньуутугар хамаанданнан иккис миэстэлэммиттэрэ.

Ветераннарга тахсан баран Контантин Иванович күрэхтэһиилэргэ ситиһиилээхтик кыттан барбыта. 2005 сыл тохсунньу 22-23 күннэригэр “Туймаада” стадион манеһыгар СР чэпчэки атлетикаҕа ветераннар ортолоругар бастыыр иһин V күрэхтэһиигэ үстэ төхтөрүйэн ыстаныыга (тройной прыжок) үһүс миэстэлэммитэ. Ити сыл атах оонньуутугар Дьокуускай куорат хамаандатын састаабыгар киирэн ветераннарга абсолютнай чемпион буолбута, атах оонньуутугар элбэх  республиканскай күрэхтэһиилэргэ ветераннар ортолоругар миэстэлэспитэ.

Константин Иванович бастакы тренердэрин Николай Семеновы, Иннокентий Гороховы, Петр Афанасьевы, Василий Михайловы, Петр Гузаировы кытта 2008 сыллаахха ыытыллыбыт “Азия оҕолоро” норуоттар икки ардыларынааҕы спортивнай оонньууларга атах оонньуутун тренеринэн үлэлээбитэ. Ол курдук ити сыл атырдьах ыйын 5 күнүгэр Харатааҕы спортивнай лицей уонна Мэҥэ-Хаҥалас улууһун оҕо спортивнай оскуолатын базаларыгар арыллыбыт спортивнай лааҕырга Мирнэйдээҕи олимпийскай резервэ спортивнай оскуолатын тренерэ Константин Иванов “Азия оҕолоругар” атах оонньуутугар бэлэмнэнэр оҕолору эрчийбитэ.

Киниэхэ 2009 сыллаахха Саха Республикатын физическэй культураҕа уонна спортка туйгунун аата иҥэриллибитэ.

         2010 сыл сааһыгар Костантин, урукку эчэйиитэ дьайан буолуон сөп, эмискэ олохтон туораабыта...

Константин Иванович кэргэнэ Арина Трофимовна Иванова (Мординова) быраас идэлээх. Кинилэр икки кыыстаахтар уонна уоллаахтар.