Иванов Никифор Никифорович Үөһээ Бүлүү оройуонун Мэйик нэһилиэгэр төрөөбүтэ. Кини төгүрүччү төрүт-хаан удьуор күүстээх төрүттэрдээх. Биир чугас аймаҕынан Степанов В.И.-Буучугурас Бөҕө буолар. 

         Оҕо сааһа олох кыһарҕаннаах аас-туор кэмнэригэр ааспыта. Аҕата эдэр сааһыгар ыарыһахтаан олохтон туораан, аҥардас ийэ көрүүтүгэр-истиитигэр иитиллибитэ. Ийэлэрэ Марыына кыра хачаайы соҕус эрээри кыым курдук кытыгырас, хаамарын сөбүлээбэт, үксүн сүүрүүнэн сылдьар дьахтар этэ. Бииргэ төрөөбүттэр биэстэр: эдьиийэ Аана, убайа Сэргэй, быраата Баһылай, балта Христина. Төбүрүөн диэн төгүрүк күөлгэ халдьаайы үрдүк эниэтигэр олохсуйан олорбуттара. Никифор кыра сааһыттан үөлээннээхтэриттэн сытыытынан, кыанарынан саамай ордуктара этэ. Төрүөҕүттэн аҥаар атаҕа кылгас буолан доҕолоҥноон хаамарын көрөн атаҕастаары да гынар бөтөстөр көстөллөрүн ол кылгас атаҕынан көмүскэнэн тохтоторо диэн табаарыстара сэһэргээччилэр. Сааһыран баран кэпсээччи: “Эдэр сааспар, күөгэйэр күннэрбэр хайа да эр бэрдигэр ханнык да түгэҥҥэ сабырыйтарбатаҕым. Студент саастарбар тыаттан киирбит бэйэм көлүөнэм оҕолорун атаҕастаппатах, үөрэхтэрин бүтэртэрбит үтүөлээхпин”.

Университетка үөрэнэр кэмнэригэр волейболга Саха АССР сборнай хамаандатын чилиэнинэн сылдьыбыта. Атаҕынан кыанара бэрт буолан площадка ортотуттан сиэткэ үрдүгэр курданарыгар дылы ойон тахсан охсор эбит. Анаан мээчиги туруортарбыт хайа баҕарар балаһыанньатыттан күүскэ охсон быһарынан оонньооччуларын салыннартыыра  үһү. 

Өрөйөр-чөрөйөр өргөстөөх кэмнэригэр тыыллан-хабыллан көрүҥэ-иттэтэ, быһыта баайталаан кэбиспит курдук былчыҥнара бурусууна курдук оонньууллара – киһи аҕыс кырыылааҕа этэ. Киһиэхэ чахчы тэҥэ суохтук кыанар буолан араас спортивнай трюктары көрдөрөрө. Күлэн-үөрэн сатарытан, саҥаран күлүбүрэтэн сахаҕа биир туспа суоллаах-иистээх эр хоһуун олох олорон орто дойдуга омурҕаннаан ааспыт эбит.           

         Никифор Иванов бэйэтин кэмигэр атах оонньуутугар куобахха республика рекордун тупсара  сылдьыбыта. Ол курдук 1962 сыллаахха Саха АССР норуоттарын 4-с спартакиадатыгар республика рекордун 17 см аһарбыта, ол эбэтэр 36 м 53 см түспүтэ. Ордук табыллан Саха АССР норуоттарын 5 спартакиадатыгар 37 м 34 см түһэн лаппа кыахтааҕын көрдөрбүтэ.

Никифор Никифорович Иванов үрдүк үөрэхтээх учуутал, өр сылларга Далыр орто оскуолатыгар директордаабыта. Дэгиттэр спортсмен, түһүлгэ саргылаах бөҕөһө, атах оонньооччу ааттааҕа, күүстээх охсуулаах боксер, волейболист бэрдэ кырдьан олорон төрөөбүт алааһын – тапталлаах Төбүрүөнүн ахтара, кумалааннаан тахсар тиитин, кылыйбыт кырдалын суохтуура, бара сылдьар баҕалааҕа. Ону сүрэх баҕатын сүһүөх уйбат буоллаҕа…