1989 с. төрүөх. Билигин Дьокуускай куоракка учууталынан үлэлиир. Атах оонньуутугар Үөһээ Бүлүү дьахталларыттан бастакы спорт маастара. Дьоно Үөһээ Бүлүүгэ уһуннук олорбуттара. Аҕата Александр Дмитриевич Иванов өр кэмҥэ РЭС-кэ үлэлээбитэ. Ийэтэ Маргарита Митрофановна Иванова идэтинэн медик.

         Валя оскуолаҕа сылдьан ДЮСШ-ҕа сүүрүүнэн дьарыктаммыта. Бастакы тренерэ СР үтүөлээх тренерэ Геннадий Алексеевич Николаев. Атах оонньуутугар Дьокуускай куоракка бу кэмҥэ Дмитрий Дмитриевич Наумовка эрчиллэр.

         60 м сүүрүүгэ СР чемпионатыгар I миэстэлээх. СР кыһыҥҥы чемпионатыгар атах оонньуутугар ыстаҥаҕа үһүс, кылыыга иккис, куобахха бастакы миэстэлэри ылаттаан уопсай түмүккэ бастаабыта. Олимпийскай чемпионка Мария Пинигина бирииһигэр Бүтүн Россиятааҕы чэпчэки атлетикаҕа күрэхтэһиигэ 100 уонна 200 м сүүрүүгэ иккис миэстэлэри ылбыта. СР чэпчэки атлетикаҕа чемпионатыгар 200 м сүүрүүгэ иккис, 100 м сүүрүүгэ иккис, сүүстүү миэтирдээх 4 этаптаах сүүрүү эстафетатыгар бастакы миэстэ буолуталаабыта.

         Валентина көрдөрүүтэ үүнэн, эбиллэн иһэр. Кини Манчаары оонньуутугар улууһун чиэһин көмүскээбитэ уонна атах оонньуутун үс көрүҥүн сууматынан 56 м 95 см көрдөрүүлэммитэ. Олунньу ый 22-23 кк. Дьокуускай куоракка СР үтүөлээх тренерэ М.Н. Абрамов сырдык кэриэһигэр ыытыллыбыт турнирга Үөһээ Бүлүү кыыһа Валентина Иванова 59 м 68 см ойон урукку көрдөрүүтүгэр 2 м 73 см эппитэ уонна улуус дьахталларга рекордун олохтообута. Бу ситиһиитинэн СР спордун маастарын нуорматын толорбута.