Бүлүү куоракка 1962 сыл бэс ыйын 10 күнүгэр төрөөбүтэ. Бүлүү аҕыс кылаастаах оскуолатыгар физкультура учуутала Николаев Василий Николаевич (туох да аймаҕа буолбатах) салалтатынан чэпчэки атлетиканан күүскэ дьарыктанан иһэн ахсыс кылааска Үөһээ Бүлүүтээҕи иккис нүөмэрдээх физиканы, математиканы уонна химияны дириҥэтэн үөрэтэр оскуолаҕа киирбитэ. Бу оскуола оҕолоро үөрэххэ эрэ буолбакка, спортка эмиэ оройуоҥҥа инники күөҥҥэ сылдьаллара.

Вася 1978 сыллаахха тохсус кылааска үөрэнэ сылдьан Саха сирин норуоттарын спартакиадаларыгар Үөһээ Бүлүү хамаандатыттан кыттан атах оонньуутугар ыстаҥаҕа улахан дьоҥҥо үһүс миэстэни ылбыта уонна РСФСР спордун маастара буолбута. Бу оччолорго чугас эргин иһиллэ илик улахан ситиһии этэ. Ити кэмҥэ РСФСР маастарын нуормата атах оонньуутун үс көрүҥүн түмүгүнэн 110 м тириэртэххинэ толоруллар этэ. Оттон Саха АССР маастарын нуормата төттөрүтүн итиннээҕэр үрдүк – 115 м этэ.

Кини 1979 сыллаахха Майаҕа сахалыы атах оонньуутугар уолаттарга Баһылай Манчаары VII спартакиадатын абсолютнай чемпиона буолбута. 1981 сыллаахха Манчаары VIII спартакиадатыгар (Майа) кылыыга уонна ыстаҥаҕа чемпионнаабыта. Итиннэ кини атах оонньуутун үс көрүҥүн түмүгүнэн  118 м аһардан Саха АССР маастарын нуорматын ырааҕынан куоһарбыта. Атах оонньуутугар Манчаары IX (1983 c., Майа), X (1985 с., Бүлүү) уонна XI (1987 с., Амма) спартакиадаларын абсолютнай чемпионнара, Саха АССР норуоттарын IX (1982 с.) уонна X (1984 с.) спартакиадаларын абсолютнай чемпиона, республика тыатын сирин 1988 уонна 1989 сыллардааҕы спортивнай оонньууларын абсолютнай чемпиона, республика элбэх төгүллээх чемпиона. Үстэ төхтүрүйэн ойууга (тройной прыжок), устаны ыстаныыга Дальнай Восток уонна Сибиир зонатын хас да төгүллээх чемпиона уонна призера.

Василий Николаев 1981 сылтан 1989 сылга диэри атах оонньуутугар кимиэхэ да иннин биэрбэккэ аҥаардастыы аатыра сылдьыбыта. Кини рекордтара 15 сыл кэриҥэ тыытыллыбакка турбуттара. Олортон биирин аан бастакыннан олох кэнники көлүөнэ ыстанааччыта Сергей Кривошапкин үйэлэр кирбиилэригэр алдьаппыта. Ол кэмҥэ Кривошапкины биир дойдулаахпыт, Василий Васильевичтан икки-үс сыл балыс Сергей Ильич Гаврильев дьарыктыы сылдьыбыта.

Василий Николаев бастыҥ ситиһиилэрэ: үс көрүҥ түмүгэр — 126 м 58 см;

Кылыыга — 45 м 29 см;

Ыстаҥаҕа — 44 м 28 см;

Куобахха — 38 м 04 см.

1983 сыллаахха 7 м 21 см уһуҥҥа ыстаммыт рекордун 2014 эрэ сыллаахха аһарбыттара.

         Василий Васильевич 1985 сыллаахха Саха государственнай университетын бүтэрбитэ, специальноһа физик. Университекка үөрэнэр кэмигэр Cаха АССР үтүөлээх тренерэ Гаврил Гаврильевич Сивцевкэ дьарыктана сылдьыбыта.

         1985-1987 сыллардаахха Бүлүүтээҕи оҕо спортивнай оскуолатын директорынан үлэлээбитэ.

         1987-1988 сылларга Дьокуускайга комсомол уобаластааҕы комитетын оборонно-спортивнай отделын инструктора.

         1992-1997 сылларга “Туймаада Даймонд”, “Саха Даймонд” тэрилтэлэргэ үлэлээбитэ.

         1997 сылтан “АЛРОСА” АК алмааһы атыылыыр филиалын салайар (ведущий) инженеринэн үлэлээбитэ. 2015 сылтан ити тэрилтэ баһылыыр (главный) инженерин промышленноска куттал суох буолуутун уонна үлэ көмүскэлин солбуйааччытынан үлэлиир.

         Саха республикатын ХХ үйэҕэ спордун лауреата. 2009 сыллаахха спортка уһулуччу ситиһиилэрин иһин Василий Николаевка Саха республикатын бочуоттаах маастарын үрдүк аата иҥэриллибитэ.

         Василий Васильевич Николаев бириистэригэр атах оонньуутугар республиканскай турнир арыт Дьокуускайга, арыт Бүлүү куоракка ыытыллар.

         Василий кэргэннээх, икки кыыстаах, сиэннэрдээх.