Далыртан бастакынан биллибитэ

         Аҕа дойдуну көмүскүүр сэрии кэнниттэн Саха сиригэр маассабай спорт балачча сайдан барбыта. Киһи бэйэтин кыаҕын билинэригэр сөптөөх таһымнаах күрэхтэһиилэр, турнирдар, спартакиадалар ыытыллар буолбуттара. Онно Далыр нэһилиэгин ыччаттара активнайдык кыттан барбыттара уонна онно сөптөөх төрүөттэр бааллара. Ол курдук, бу кэмҥэ Далырга кус-быһый, ат-бөҕө дьон сэрии инниттэн оскуолаҕа үлэлээн ааспыттара, сорохторо үлэлии сылдьаллара. Ол курдук А.П. Васильев- Мордьонноохоп, А.С. Иванов, Иев уонна Савва Дмитриевтар, П.С. Рожин, А.И. Донской, Владимир Петрович уонна Пантелеймон Петрович Судиновтар олорон, үөрэнэн, эрчиллэн, буһан-хатан тахсыбыттара.

         Бүгүн биһиги ахтан-санаан ааһар киһибит Далыр нэһилиэгэр төрөөбүт, мантан үүнэн-сайдан тахсан Саха сиригэр киэҥник биллибит Саха АССР спордун маастара Пантелеймон Семенович Рожин буолар. П.С. Рожин Далыр нэһилиэгэр кыанар дьоҥҥо төрөөбүт буолуон сөп. Дьокуускай куоракка биэксэл үөрэҕэр үөрэммитэ уонна Мэҥэ-Хаҥалаһынан үлэлээбитэ. Мэҥэҕэ да баардаах-баардаах курдук атах оонньуутугар, мас  тардыһыытыгар биллибитэ-көстүбүтэ. Маҥнайгы улахан ситиһиитинэн 1945 сыллаахха IV Саха сирин спартакиадатыгар мас тардыһыытыгар уонна куобахха бастаабыта буолар. Бу туһунан «Спорт Манчаары дойдутугар» диэн кинигэҕэ суруллубута. П. Рожин куобахха бастыҥ көрдөрүүтэ – 33 м 55 см –  ити кэмҥэ, ол эбэтэр 1949 сыллаахха, Саха сирин рекорда эбит. П. Рожин ыстаҥаҕа 36 м 18 см эмиэ бу дьыл ойон рекорд олохтообут. П.С. Рожин ити курдук Саха АССР IV, V, VI, VII спартакиадаларыгар кыттан Саха АССР 8 төгүллээх чемпиона буолбут эбит. Ол иһин 2001 сыл кулун тутар 30 күнүгэр буолбут Спорт министерствотын коллегиятыгар Далыр нэһилиэгиттэн 3 киһиэхэ: П.С. Рожиҥҥа, А.И. Донскойга уонна М.Н. Еремисовка «Саха сирин 20-с үйэҕэ спортка лауреата» бочуоттаах аат иҥэриллибитэ.