Федоров Семен Михайлович-Буоппал уола

(1911-1969)

         Кини 1911 сыллаахха II Үөдүгэй нэһилиэгэр дьадаҥы дьиэ кэргэҥҥэ төрөөбүтэ. 1936 сыллаахха юридическай оскуоланы бүтэриэҕиттэн Үөһээ Бүлүүгэ комсомол райкомугар икки сыл отдел сэбиэдиссэйинэн үлэлээбитэ. 1938-61 сылларга Үөһээ Бүлүү, Бүлүү, Өлүөхүмэ, Нам, Уус-Маайа, Ньурба оройуоннарыгар прокурорунан үлэлээбитэ. 1960-64 сылларга Эдьигээн, Үөһээ Бүлүү оройуоннарыгар милиция отделын начальнигынан сулууспалаабыта. 1964-68 сылларга партия Үөһээ Бүлүүтээҕи райкомугар инструктордаабыта. Ол кэннэ райпотребсоюз председателин кадрга солбуйааччытынан үлэлии сылдьан массыына саахалыгар түбэһэн олохтон хомолтолоохтук туораабыта.

         Семен Михайлович сахалыы ыстаныыларга уһулуччу дьоҕурдаах киһи этэ. Бэйэтин кэмигэр Бүлүү оройуоннарын ыһыахтарын тэрийэ сылдьан атах оонньууларыгар кыттан маҥнайгы бириистэри хас да сыл ылбыта. Семен Федоров саха аатырбыт кылыыһытын Дмитрий Босиковы Дьокуускайга күөн көрсөн аҕыйах сантиметрынан кыайбыт соҕотох киһинэн буолар. Ол рекорда кэмнэммэккэ хаалбыта хомолтолоох.