Иванова Фаина Евстафьевна Чурапчы улууһун Чурапчы сэлиэнньэтигэр 1961 с. алтынньы ый 14 к. үс оҕолоох оробуочай ыалыгар 4-с оҕонон төрөөбүтэ.

Ийэтэ ыарыһахтаан эрдэ күн сириттэн күрэнэн кыра эдьиийигэр Лебедева Раиса Евстафьевнаҕа (1 № И.Н. Бараахап аатынан оскуола начальнай кылаас учууталыгар) уонна күтүөтэ Ченохов Василий Васильевичка (оччотооҕута ырыа учууталыгар) көһөн кэлэн 1974 с. Үөһээ Бүлүү сэлиэнньэтигэр, онтон 1976 с.Үөдугэй нэһилиэгэр олорбута.

1980 с. оскуоланы ситиһиилээхтик бүтэрэн баран комсомол путевкатынан үөрэх үрдүк кыһатын тутуһан дойдутуттан ыраах баран Казань куоракка омук тылын баһылаары экзамен туттара сылдьан дьонун ахтан ситэри туттарсыбакка Үөһээ Бүлүүгэ төннөн кэлбитэ уонна И.Н. Бараахап аатынан оскуолаҕа эдэр ыччат лидерынан, онтон “Үөдүгэй” сопхуос босхоломмут комсомольскай сэкэрэтээринэн үлэлээбитэ.

1988 с. Дьокуускайдааҕы М.К. Аммосов аатынан государственнай университет историко-филологическай факультетын нуучча тылын уонна литературатын салаатын бүтэрэн учуутал-филолог идэтин баһылаан иккис дойду оҥостубут Үөһээ Бүлүүтүгэр төннөн кэлэн, билии ылбыт оскуолатыгар нуучча тылын уонна литературатын учууталынан ананан үлээлээбитэ.

1994 с. Үөһээ Бүлүүтээҕи Ис Дьыала отделыгар үлэтин ИДН ст. инспекторынан саҕалаабыта, онтон каадыры кытта үлэлиир салааҕа өр сыл сулууспалаан баран пааспары визалыыр сулууспа салайааччытынан үлэлээбитэ, 2007 с. милииссийэ, үлэ бэтэрээнэ.

2008 с. гражданскай үлэҕэ көспүтэ, культура управлениетын салайааччытынан, сокуоннай саастарын ситэ туола илик оҕолор бырааптарын көмүскүүр уонна дьыалаларын көрөр улуус дьаһалтатын иһинэн үлэлиир комиссия эппиэттээх сэкирэтээринэн уонна 2012 с.  күн бүгүнүгэр дылы үлэҕэ харастабыллаах буолуу салаа кылаабынай специалиһынан үлэлии сылдьар.

Иллэҥ кэмигэр тэрилтэлэр уонна нэһилиэктэр икки ардыларыгар ыытыллар буулдьанан ытыы күрэхтэригэр боростуой “воздушка” саанан кыттан бириистээх миэстэлэргэ тиксэрэ, дьиэ кэргэнин кытары айылҕаҕа кыралаан балыктыырын, бултуурун сөбүлүүр.   

2014 с. пневматическай саанан ытарга дьарыктанан барбыта. 2014 с. сэтинньититтэн Карадчин Лаврентий диэн саҥа үлэһит киирэн, эмиэ ити үлэ сэргэхсийэ түспүтэ, ол эрэн бу сырыыга хамаанда талыллан, ытарга талааннаах, баҕалаах, опыттаах дьон баар буолан бары уопсай сүбэнэн араас таһымнаах улуус иһигэр, республика таһымыгар ыытыллар күрэхтэргэ кыттыыны ылан кыралаан бириистээх миэстэлэргэ, сороҕор бастакы миэстэ үрдүк чыпчаалыгар тахсыталаабыттара, хамаанда чилиэттэрэ биирдиилээн чемпион, абсолютнай чемпион ааттарын ылбыттара. Бу кэмҥэ республикаҕа да аан бастаан “Белка ПС” диэн көрүҥ киирбитэ уонна буулдьанан ытыы сайдан, тарҕанан республика маастарын үрдүк аатын сүкпүт спортсмен аата элбээн барбыта.

Биһиги улуус буулдьанан ытыыга хамаанданан уонна биирдиилээн миэстэлэспит үрдүк таһымҥа ыытыллыбыт күрэхтэрэ: Дьокуускай куоракка сылын аайы ыытыллар Аҕа дойду сэриитин кыттыылаахтара, Уус-Алдантан төрүттээх убайдыы-бырааттыы Оллооновтор бириистэригэр анаммыт турнир, Бүлүү куоракка тэриллэн ыытыллыбыт Аҕа дойду сэриитин кыттыылааҕа Д.М. Гуляевка анаммыт күрэх, Үөһээ Бүлүү Хоротугар ыытыллыбыт Аҕа дойду сэриитин кыттыылааҕар Анисим Прокопьевка анаммыт турнир, 2017 с. олунньу ый 23-24 кк. Горнай улууһугар ыытыллыбыт Россияҕа ох саанан ытыыга рекордсмен, Сэбиэскэй Сойуус Сэбилэниилээх күүстэрин чемпиона Н.Н. Лукиҥҥа анаммыт чемпионат (хамаанда 1 миэстэ, Фаина Евстафьевна бэтэрээн дьахталларга 260 очкону ылан бастаабыта), 2017 с. муус устар 8-9 кк. Манчаары Спартакиадатыгар хамаандалары сүүмэрдиир чемпионакка бэтэрээн дьахталларга финалга тахсан чемпион үрдүк аатын ылан, республика буулдьанан ытыыга спордун маастарын нуорматын толорбута. Улуус, нэһилиэк чиэһин көмүскүүргэ үс сыл устата сэмэй кылаатын киллэрэн  улуус спордун управлениетыгар, хамаандаҕа бииргэ үлэлэспит салайааччытыгар махтанар.