Карадчин Лаврентий Владимирович 1969 с. Үөһээ Бүлүү нэһилиэгэр төрөөбүтэ. 2014 с. Үөһээ Бүлүүтээҕи Д.С. Спиридонов аатынан 4 №-дээх оскуолаҕа эбии үөрэхтээһиҥҥэ оҕолору “Сонорго” эрчийэ сырыттаҕына, улуустааҕы спорт управлениетын начальнига Николаев Е.А. хамнас аҥарыгар буулдьанан ытыы тренеринэн үлэҕэ ыҥырбыта. Үлэлииргэ элбэх ыарахаттар бааллара. Материальнай база суоҕун кэриэтэ, биир газобаллоннай саа баара, тир оҥоһуллубакка турара. Бастакы хамаанданы сүүмэрдииргэ көмө буолбут, сүүрсүбүт-көтүспүт дьоннорунан уонна сүрүн кыттааччыларынан милиция ветерана А.Н. Чоросов, полиция сотруднига А.А. Оконосов, полиция ветерана, билигин Уус-Алдаҥҥа олорор М.С. Ущницкай, управление бэйэтин үлэһитэ Т.И. Титова буолбуттара уонна ДЮСШ директора Семенов В.Н. элбэх сүбэ-ама биэрэн көмөлөспүтэ. Билиҥҥи туругунан наадалаах саҥа оборудованиенан хааччыллыы барда, ол да үрдүнэн билигин да итэҕэс элбэх. Төһө кыалларынан күрэхтэргэ кыттыыны ылан, бары тэҥҥэ көрөн-истэн үөрэнэн кэллилэр. Буулдьанан ытыы Федерациятын бэрэссэдээтэлинэн улуустааҕы экология тэрилтэтин начальнига Титов В.В. талыллан үлэлиир. Спорт управлениетын начальнига Николаев Е.А. буулдьанан ытыы көрүҥэ улууска сайдыытыгар ахсаабат болҕомтотун уурар. Үгүс ситиһиилэргэ бастакы иитиллээччилэр кылааттара улахан, ол курдук, Кириллина Аина, Варфоломеева Юлия, Оконосова Айыына, Мандаров Костя, Афанасьева Кристина, Иванов Игорь, Карадчина Люба, оттон улахан дьонтон Андреева Саргылана, Васильева Марианна, Кардашевская Надежда улуустарын чиэһин көмүскээн кэллилэр. Иванов Игорь, Прокопьева Рада, Прокопьева Мира Сунтаардааҕы оҕо спортивнай оскуолатыгар салгыы үөрэнэн баран, билигин улуус сүүмэрдэммит хамаандатыгар дьарыктанан эрэллэр. Билиҥҥи хамаандаҕа республикаҕа биллэр ситиһиилээх дьоннор, ол курдук, 2016 с. маастар нуорматын толорбут, туруоруммут соругун ситиһэр Т.Н. Яковлева, кыайыыга дьулуурдаах И.И. Морфунов, В.Н. Николаев, маастарга кандидат нуорматын толорбут О.И. Андреева баар буоллулар. 2017 с. муус устар ыйга буулдьанан ытыыга Саха Республикатын Федерациятын чемпионата буолбута, онно Манчаары Спартакиадатыгар сүүмэрдиир күрэххэ 9 путевканы ылары ситистилэр уонна Саха Республикатын буулдьанан ытыыга спорт маастарын нуорматын Васильева Марианна Вадимовна, Титова Татьяна Ивановна, Иванова Фаина Евстафьевна, Карадчина Люба, Карадчин Лаврентий Владимирович толордулар. Инникитин үчүгэй хааччыллыылаах, ирдэбилгэ эппиэттиир тир баар буоллаҕына ситиһиилэр да үксүү туруо этилэр диэн эрэниэҕи баҕарыллар.

Лаврентий Владимирович ситиһиилэрэ:

2014 с. от ыйыгар республиканскай педагогическай ярмарка чэрчитинэн Уус-Алдаҥҥа ыытыллыбыт интеллектуальнай биатлоҥҥа чемпион.

2015 с. Бүлүүгэ Д.А. Гуляев бирииһигэр республиканскай буулдьанан ытыыга күрэххэ 3 миэстэ.

2015 с. Бүлүүгэ буулдьанан ытыыга республиканскай күрэххэ чемпион.

2015 с. Үөһээ Бүлүүгэ ыытыллыбыт А. Прокопьев бирииһигэр республиканскай буулдьанан ытыыга күрэххэ чемпион.

2016 с. Советскай Союз Геройдарын Кондаков Н.А., Миронов А.А., Степанов Н.С. бириистэригэр буулдьанан ытыыга республиканскай күрэххэ 2 миэстэ.

2016 с. Үөһээ Бүлүүгэ сэрии ветераннарын чиэһигэр ыытыллыбыт улуустааҕы күрэххэ 2 миэстэ.

2016 с. Дьокуускайга Алексеев У.Н. бирииһигэр ыытыллыбыт буулдьанан ытыыга күрэххэ 3 миэстэ.

2017 с. Дьокуускайга бырааттыы Оллоновтар бириистэригэр ыытыллыбыт республиканскай күрэххэ 3 миэстэ.

2017 с. Горнай улууһун Бэрдьигэстээҕэр Лукин Н.Н. бирииһигэр ыытыллыбыт буулдьанан ытыыга республиканскай күрэххэ чемпион.

2017 с. муус устар ыйга буулдьанан ытыыга Саха Республикатын Федерациятын чемпионатыгар 264 очкону ылан түөрт иһигэр киирэн, Манчаары Спартакиадатыгар сүүмэрдиир күрэххэ путевка ылары ситистэ уонна Саха Республикатын буулдьанан ытыыга спорт маастарын нуорматын толордо.

Лаврентий Павловичка эрэлбит улахан, үлэтигэр, күрэхтэһиилэригэр ситиһиини баҕарабыт.