Карадчина Люба 2003 с. муус устар 18 к. Үөһээ Бүлүү бөһүөлэгэр төрөөбүтэ. Ийэтэ Мария Романовна оскуолаҕа, аҕата Лаврентий Владимирович буулдьанан ытыы тренеринэн үлэлииллэр. Кыра эрдэҕиттэн, 8-9 саастааҕыттан, аҕатын кытта салгын саатынан (воздушканан) сыал ытарга үөрэммитэ. Тиэргэннэригэр мишень оҥостон, ким элбэхтик табарый диэн куоталаһыы оҥороллор эбит. Аҕата Үөһээ Бүлүүтээҕи Д.С. Спиридонов аатынан 4 №-дээх оскуолаҕа оҕолору «Сонорго» эрчийэр этэ, онно баран эрчиллээччи. Оттон сайын Дьокуускай куоракка «Дружба» лааҕырга сынньана сылдьан, лааҕырдар икки ардыларыгар саанан ытарга куоталаһыы буолбутугар 1 м ылбыта. Ити 2014 с. этэ. Онтон ыла аҕатыгар тиргэ дьарыктанан барбыта.

2015-2016, 2016-2017 үөрэх сылларыгар оскуолалар икки ардыларынааҕы Спартакиадаларга 1, 2 миэстэлэри ылаттаабыта. Республиканскай буулдьанан ытыы күрэхтэригэр:

2015 с. Үөһээ Бүлүүгэ ыытыллыбыт күрэхтэһиигэ 1 миэстэ;

2015 с. аатырбыт снайпер Д.А. Гуляев бирииһигэр республиканскай турнирга 1 миэстэ;

2016 с. Кэнтиккэ Советскай Союз Геройа Алексей Миронов аатын үйэтитиигэ ыытыллыбыт улуустааҕы күрэххэ 3 миэстэ;

2017 с. Горнай улууһугар ыытыллыбыт Н.Н. Лукин бирииһигэр буулдьанан ытыыга 12 хамаандаттан Үөһээ Бүлүү хамаандата 1 миэстэни ылары ситиспитэ уонна  убаһанан   наҕараадаламмыта;

2017 с. муус устар ыйга буулдьанан ытыыга СР Федерациятын чемпионата буолбута. Манна 260 очкону ылан биэс иһигэр киирэн, Манчаары Спартакиадатыгар сүүмэрдиир күрэххэ путевка ылары ситистэ уонна СР буулдьанан ытыыга спорт маастарын нуорматын толордо.