Кардашевская Надежда Петровна 1963 с. олунньу ый 28 к. Үөдүгэй нэһилиэгэр элбэх оҕолоох холкуостаах ыалга сэттис оҕонон төрөөбүтэ. Үрдүк экономическай үөрэхтээх, Ис дьыала сулууспатын бэтэрээнэ, үлэ бэтэрээнэ. 22 сыл Ис дьыала уорганнарыгар сулууспатыттан (Горнай улууһа, Дьокуускай куорат, Үөһээ Бүлүү), 16 сыл каадыры иитэр-өйдөтөр үлэҕэ анаабыта. Пенсияҕа  Үөһээ Бүлүүтээҕи Ис дьыала отделын начальнигын каадыры кытары үлэҕэ солбуйааччытын дуоһунаһыттан тахсыбыта, полиция подполковнига. Билигин Үөһээ Бүлүү улууһун дьаһалтатын сокуоннай сааһын ситэ илик оҕолор дьыалаларын көрөр уонна кинилэр бырааптарын көмүскүүр хамыыһыйа кылаабынай специалиһынан үлэлиир, төрөөбүт Үөдүгэйигэр олорор. Уол оҕолоох — студент, ийэтин батан эмиэ ытыыга республикаҕа миэстэлээх, инникитин ытыынан дьарыктанар санаалаах.

Ис дьыала уорганнарыгар үлэлиир кэмигэр 1989-2011 сылларга «Макаров” бэстилиэтинэн ытыыга элбэх төгүллээх Бүлүү зонатын чемпиона, призера, Ис дьыала Министиэристибэтин аппараатын иһинэн күрэхтэр хас да төгүллээх призердара.

2014 с. пневматическай бэстилиэтинэн ытыынан дьарыгын кыралаан саҕалаабыта. Бу да иннинэ борустуой бүк тутуллар воздушканан улууһун, нэһилиэгин чиэһин элбэхтэ ситиһиилээхтик көмүскээбитэ. Ити сыл Нам улууһугар ыытыллыбыт 6 -с Хотугу норуоттар оонньууларыгар путевка ылан “ПП -2” упражнениеҕа (40 ытыы) кыттар чиэскэ тиксибитэ.

2015 с. Саха Өрөспүүбүлүкэтин буулдьанан ытыы Федерациятын бирииһигэр ыытыллыбыт күрэххэ, ПП-2 упражнениеҕа дьахталларга 3 миэстэни ылан 1 разряд нуорматын толорбута.

2015-2016 сс. Саха Өрөспүүбүлүкэтин буулдьанан ытыы Федерациятын күрэхтэригэр «Бэргэн-ПП» (түргэн ытыы), «ПП-2» упражнениеларга 1, 2, 3 миэстэлэри ылаттаабыта.

2016 с. Саха Өрөспүүбүлүкэтин буулдьанан ытыы Федерациятын  бэрэссэдээтэлин Кубогар бэтэрээннэр ортолоругар «Бэргэн-ПП» упражнениеҕа абсолютнай кыайыылааҕынан буолбута.

Билигин маастар нуорматын толорор иһин үлэлиир.