Титова Татьяна Ивановна, 1961 с. Горнай улуус Бэрдьигэстээҕэр төрөөбүтэ. Идэтинэн бухгалтер, 21 сыл Үөһээ Бүлүүтээҕи милиция отделыгар үлэлээн пенсияҕа тахсыбыта. Билигин администрация иһинэн централизованнай бухгалтерия алта тэрилтэ кылаабынай бухгалтера.

Буульданан ытыыга бастакы холонуута 2014 с. ахсынньы ыйыттан саҕаламмыта. Ол сыл Бүлүү куоракка уоттаах сэрии геройдарыгар аналлаах региональнай күрэххэ үһүс бириистээх миэстэни ылан, онтон кынаттанан, саанан ытыыга ылсан дьарыктанаары бэйэтигэр "Valter" сааны атыыласпыта. Ити кэмнэргэ тиир базата мөлтөҕө. 2015 с. Үөһээ  Бүлүүтээҕи спорт комитетын начаалынньыга Николаев Егор Алексеевич салалтатынан, энтузиаст-тренер Карадчин Лаврентий Владимирович уонна илиитигэр маастар, маһы хаамтарар, эмиэ ытыынан дьарыктанар Чоросов Анатолий Николаевичтыын буулдьанан ытыыга тиир оҥорон, эрчиллиигэ сөптөөх усулуобуйаны тэрийбиттэрэ.

Дьэ итинтэн саҕаламмыта буулдьанан ытыы базата бөҕөргөөһүнэ. Икки "Umarex" саа, пистолеттар, мишеннэри сүүрдэн аҕалар уотунан барар установка уонна компьютернай скатт-тренажер атыылаһыллыбыттара. 2016 с. эбии икки саа ылыллан билигин ытыы түмүктэрэ үрдээн иһэрэ үөрдэр. Билигин Үөһээ Бүлүүгэ буулдьанан ытыы күрэҕин ыытыахха сөбүн Хороҕо сэрии ветерана Прокопьев А.Г. бирииһигэр ыытыллыбыт республиканскай күрэх буолбута туоһулуур. Онно чугас эргин тыалартан эмиэ кытта кэлбиттэрэ дьон-сэргэ бу көрүҥү интириэһиргиир, дьарыктаныан баҕалааҕын көрдөрдө.

Татьяна Ивановна үлэ кэнниттэн баран ытан күннээҕи сыыппара үлэтиттэн сынньанан уонна ытан истэҕин аайы түмүгэ улаатан иһэритгэн дуоһуйууну ылар.

Араас улуус таһымнаах буулдьанан ытыы күрэҕэ баар буоллаҕына кыттар, хамаандаҕа очко эбэринэн киэн туттар. Билигин даҕаны инникитигэр эрэллээх, буулдьа ытыытынан дьарыктанарын бырахпакка, саас ыларын аахсыбакка, сиэнин сыһыаран дьарыктыыр санаалаах, үчүгэй кыахтаах саа ыларга сорук туруорунан сылдьар.

2017 с. муус устар ыйга 20 үбүлүөйүнэй "Манчаары оонньуулара» Спартакиадаҕа путевка ылар күрэххэ киирсэн, Манчаары оонньуутун күрэҕэр путевка ылан кыттар чиэскэ тигистэ уонна 245 очкуоланан буулдьанан ытыы маастара буолла. Бу ситиһии  баар кыаххын туһанан дьарыктанаргыттан, сыал туруорунан бириэмэҕин аттараргыттан уонна баҕа санааны толороргор күүскүн-уоххун уураргыттан тахсар. Итиэннэ дьиэ кэргэниҥ өйүүр, көмөлөһөр буоллаҕына, атыҥҥа аралдьыйбакка турууластаххына ылсыбыт сыалгын толороҕун.

Оҕо сааһын баҕата, саанан ытыы кыаллыбатаҕын да иһин, буулдьанан ытыыны биһирээн дьарыктанарыттан үөрэр уонна өссө да үрдүк кирбиилэр, күрэхтэр инники өттүгэр баар буолалларыгар баҕарар. Бу ытыы киһи ис туругар хомуллууну, доруобуйа ыһыллыбатыгар биир төһүү күүс буоларын өйдөөтө. Тренерэ Карадчин Л.В. такайбыт эрчиллиитин ылынан маастар нуорматын толорбутуттан үөрүүтэ муҥура суох уонна Манчаары Спартакиадатыгар инники күөҥҥэ сылдьар туһуттан күүскэ эрчиллэр,  сөбүлүүр дьарыгын дьүөрэлээн, инникигэ эрэллээх олоҕун устун баран иһэр.