Яковлева Татьяна Николаевна 1963 с ыам ыйын 10 к. Үөһээ Бүлүү улууһун Хоро нэһилиэгэр төрөөбүтэ. Идэтинэн үрдүк үөрэхтээх, үрдүк категориялаах учуутал.

Спорт эйгэтигэр оҕо эрдэҕиттэн сыстыбыта. Сүүрүүгэ, хайыһарга, баскетболга, волейболга, остуол тенниһигэр, хаамыскаҕа, хабылыкка улуус, регион, республика таһымыгар бириистээх миэстэлэрдээх. Манна даҕатан эттэххэ, ийэтэ Обулахова Ульяна Семеновна улууска бэйэтин кэмигэр тустан дьахталларга иннин биэрбэтэх, сэниэлээх, сымса дьахтар эбитэ үһү. Аҕата Яковлев Николай Иванович, атаҕар лаппа кыанар киһи этэ. Ол эрэн үлэттэн ордубакка күрэхтэспэккэ хаалбыта. Онон спорт араас көрүҥэр дэгиттэр сайдыылаах төрөппүттэриттэн бэриллибит буолуохтаах.

Ытыыга аан маҥнай тэрилтэ күрэҕиттэн саҕалаабыта. Онно Хороҕо саҥа спорт залата тутуллан киирбитэ төрүөт буолбута. Онтон ыла түгэнтэн түгэҥҥэ туох да дьарыга суох сылдьан,  «сарсын ыта киир» диэнинэн мэлдьи күрэхтэһэ киирэрэ. 2015 с. дылы боростуой переломка сааларынан киирэн ытааччы. Онтон 2015 с. кыһын хабылык, хаамыска дьарыгар сырыттаҕына Лаврентий Владимирович тиргэ ытыыга дьарыкка ыҥырбыта. Онон 2015 с.  сэтинньигэ переломканан Бүлүү бөлөх улуустарын күрэҕэр, республиканскай турнирдарга кыттан чемпион уонна иккис призер буолбута. Ахсынньы ыйга илиитигэр аан бастаан газобаллон  сааны туппута уонна III м буолбута. Инньэ гынан хайаан да бэйэтэ туспа сааланар баҕа санаа киирэн кэлбитэ, тоҕо диэтэххэ күн аайы дьарык гынар эрэ киһи тугу эмит ситиһиэн сөптөөҕүн өйдөөбүтэ. 2016 с. тохсунньуга бас билэр вальтер сааланан, кэргэнэ  Василий Васильевич күн аайы такайыытынан дьарыктанар.

Спорт диэни билсиэҕиттэн саамай олоҕор үөрүүлээх күнүнэн 2016 с. ахсынньы 25 к. буолар. Бу күн буулдьанан ытыы «Белка-ПС» көрүҥэр Саха сирин маастарын нуорматын улуустан бастакынан ылан, хамаанда дьонугар ааны арыйбыта, эрэл кыымын сахпыта.

Татьяна Николаевна переломка саанан ытыыга ситиһиилэрэ: 2010-2017 сс. улуустааҕы үөрэх үлэһиттэрин Спартакиадатыгар II м, I м; 2014 с. Бүлүү бөлөх улуустарын үөрэҕириитин үлэһиттэрин Спартакиадатыгар II м; 2015 с. Д.А. Гуляев бирииһигэр республиканскай турнирга III м. 

Газобаллон саанан ытыыга ситиһиилэрэ: 2015 с. Үөһээ Бүлүү улууһун ИДьО аһаҕас турнирыгар III м; 2016 с. Советскай Союз Геройдара Миронов А.А., Кондаков Н.А., Степанов Н.С. бириистэригэр республиканскай турнирга I м; 2016 с. сэрии ветераннарын бириистэригэр республиканскай күрэххэ II м; 2016 с. интернационалист-буойун, Бойобуой Кыһыл Знамя орден кавалера У.Н. Алексеев бирииһигэр республиканскай күрэххэ III м; 2016-2017 сс. Бүлүү бөлөх улуустарын үөрэҕириитин үлэһиттэрин Спартакиадатыгар I м; 2016 с. буулдьанан ытыыга СР Федерациятын күрэҕэр спорт маастарын нуорматын толорор, 2017 с. буулдьанан ытыыга СР Федерациятын чемпионатыгар, Манчаары Спартакиадатыгар сүүмэрдиир күрэххэ путевка ылан эрчиллэ, бэлэмнэнэ сылдьар.