Арсен 1989 с. Үөһээ Бүлүү улууһун Мэйик нэһилиэгэр Владимир Федоров дьиэ кэргэнигэр төрөөбүтэ. Аҕата Владимир Афанасьевич спорду тэрийэр, спорт диэн баран муннукка ытаабыт киһи. Онон да буолуо, оскуолаҕа сылдьан, спорт хас да көрүҥүнэн дьарыктаммыта. Хапсаҕай тустуунан, мас тардыытынан дьарыктаммыта. “Өбүгэлэр оонньууларыгар” оҕолорго республика күрэхтэһиитигэр үчүгэйдик кыттан турар. Мас тардыытыгар улууска, Бүлүү зонатыгар күрэхтэспитэ, ситиһиилэр бааллара. Арсены В.В. Санников, А.С. Дмитриев дьарыктаабыттара. Арсентий университетка үөрэнэр кэмигэр дзюдонан, самбо тустуунан дьарыктанар. Кини дзюдо тустууга 62 кг Дьокуускай куоракка II  м ылар. Ити дьыл республика чемпионатыгар 62 кг II м, 2010 с. Дьокуускай куорат чемпионатыгар III м ылар 62 кг, 2011 с. дзюдоҕа СР чемпиона, 2012 с. Дальневосточнай Федеральнай Округ чемпионатыгар II м ылар уонна РФ маастарыгар кандидат буолар. 2012 с. Саха сирин чемпионатыгар 66 кг дзюдоҕа II м ылар. Арсентий аны самбо тустууга 2011 с. үтүөлээх тренер Измеров В.К. бирииһигэр III м ылар. Самбо тустууга СР икки төгүллээх чемпиона, 2012, 2013 сс. Бу тустууга РФ спордун маастарыгар кандидат. Аны  Арсентий быраабылата суох охсуһууга 2013 с. республика чемпионатыгар 62 кг II м ылар. 2011 с. самбо тустууга Федеральнай округка 62 кг II м ылар. РФ Сэбилэниилээх күүстэригэр сулууспалыыр кэмигэр Хабаровскай куорат ууга барыытыгар хорсун быһыыны оҥорон боевой мэтээллээх.

         Бу кэмҥэ Арсентий Владимирович Дьокуускайга кадетскай оскуолаҕа учууталлыыр уонна дзюдо, самбо тустууларга оҕолору дьарыктыыр. Эрчийэр оҕолоро  ситиһиилэнэн эрэллэр. Москва куоракка Аан дойду 5 төгүллээх чемпиона Евгений Гларионов турнирыгар бириистээх миэстэҕэ киирбиттэрэ, эдэр тренер быйыл бэйэтэ республика чемпионатыгар самбоҕа 62 кг III м ылла. Арсентий Федоров Үөһээ Бүлүү улууһун 10 бастыҥ спортсменнарын иһигэр 2 төгүл киирбитэ.