Федот Васильевич 1941 с. Боотулуу нэһилиэгэр төрөөбүтэ. Федот 1948 с. Боотулуу 7 кылаастаах оскуолатыгар үөрэнэ киирэр, салгыы Далыр орто оскуолатын 1962 с. үөрэнэн бүтэрэр. Оскуолаҕа үөрэнэр кэмигэр көҥүл тустуунан, хайыһарынан, волейболунан, дуобатынан, саахыматынан дьарыктаммыта. Оскуола кэнниттэн Советскай Армия кэккэтигэр 3 сыл сулууспалыыр. Бу сулууспалыыр кэмигэр самбо тустуунан күүскэ дьарыктанар, байыаннай уокурук чемпионатыгар чемпион буолар уонна ССРС спордун маастарын нуорматын толорор. Аармыйа кэнниттэн 1965-1967 сс. Маҥаас оскуолатыгар интернатка иитээччинэн үлэлиир. 1967 с. Саха государственнай университетыгар география учууталын идэтигэр үөрэнэ киирэр. 5 сыл үөрэнэн учуутал идэтин ылар. 1971 с. Уарова Лидия Фомичнаны көрсөн, дьоллорун холбоон ыал буолаллар.

         Федот Васильевич аҕыйах саҥалаах киһи этэ, онон тустуутун соччо кэпсээбэт этэ. Үөрэнэр кэмигэр самбо тустууга Саха сиригэр икки төгүл бастаабыта, Сибиир уонна Уһук Илин зоналарын чемпионатыгар миэстэлэспитэ. Хапсаҕай тустуунан да бэркэ тустара, бастакы 1965 сыллааҕы Буучугурас бирииһигэр 64 кг ыйааһыннаахтарга тустан табаарыһа Анатолий Семенов (Сургуулук) кэнниттэн иккис миэстэ буолбута. Хойутуу ветеран буолан баран совхоз, оройуон куоталаһыытыгар биирдэ эмит тустааччы. Тустарын көрдөххө сүрдээх бөҕө көрүҥнээх киһи эбит этэ, кэтэнэн-мананан тустубат, “бултаһан” тустар киһи эбит этэ.

         Ксенофонтовтар биэс оҕолоох ыаллар, билигин оҕолоро бары улахан дьон, бары үрдүк үөрэхтээх специалистар.

         Федот Васильевич Тойоку, Кырыкый оскуолаларыгар директорынан өр сылларга үтүө суобастаахтык үлэлээбитэ. Ордук Кырыкыйга табыллан үлэлээбитэ. Федот Васильевич Кырыкыйга үлэлии сылдьан аҕыс кылаастаах оскуоланы табаарыстарын Е.Н. Михайловтыын, Н.З. Дмитриевтыын кытары туруорсан орто оскуола оҥорбуттара, үгүс бастыҥ учууталлар кэлэн үлэлээбиттэрэ.

         Тыа киһитин быһыытынан сылгы, сүөһү ииттэрэ, сүрдээх кыайыгас-хотугас үлэһит киһи этэ, от оттуура, мас мастыыра. Дьоҥҥо мааны майгылаах, үтүө сыһыаннаах киһи этэ, ол эрэн салайааччы, директор быһыытынан ирдэбиллээх, эппитин толотторор, эрэннэрбитин толорор салайааччы этэ. Уоппускатын кэмигэр бултанара, байанайдаах киһи этэ.

         Федот Васильевич элбэх оҕо, төрөппүт, салалта махталын ылбыт киһи. Кини сыралаах, үтүө суобастаах үлэтэ үрдүктүк сыаналанан РФ үөрэҕириитин туйгуна, Учууталлар учууталлара ааттар иҥэриллибиттэрэ.

         Федот Васильевич ыар ыарыыттан 66 сааһыгар олохтон барбыта. Кини олоҕун оҕолоро, сиэннэрэ салгыыллар.