Лебедкин Семен Руфович 1949 с. алтынньы 3 к. Үөһээ Бүлүү улууһун Ороһу нэһилиэгэр колхозтаах кэргэҥҥэ төрөөбүтэ.

1974 с. Бүлүүтээҕи педучилищены бүтэрбитэ.

1980 с. Хабаровскайдааҕы физкультурнай институту кэтэхтэн бүтэрэр.

1988 с. Өлүөхүмэтээҕи тыа хаһаайыстыбатын техникумун бүтэрэр.

Спорду кытта дьиҥнээхтик доҕордоһорго ыҥырбыт киһинэн Афанасий Павлович Иванов буолар.

Оҕо сааһыттан тустуунан, хайыһарынан дьарыктаммыта. Ахсыс кылааска үөрэнэ сырыттаҕына, улуу тренер Д.П. Коркин быһаччы ыҥырыытынан Үөһээ Бүлүү оройуонуттан аан бастакынан Чурапчы аатырбыт тренер тустуутун саалатын аанын аһан, эрчиллибитинэн барбыта, тустуук быһыытынан буспута-хаппыта. Училищеҕа үөрэнэр сылларыгар спордунан күүскэ дьарыктанан, улахан спортка бастакы хардыылары оҥортообутунан барар. Ол курдук көҥүл тустууга, хапсаҕайга Бүлүү зонатыгар элбэх төгул чемпион, призер буолуталыыр. 1973 с. ыытыллыбыт Манчаары IV Спартакиадатыгар иккис миэстэлэһэр, аатырбыт тустуук Максим Васильев кэнниттэн. 1973 с. тувалыы «хуреш» тустууга Саха АССР хамаандатыгар киирэн  республика чиэһин 4 сыл субуруччу ситиһиилээхтик көмүскүүр, 4 сыл устата иккис бириистээх миэстэттэн түспэтэҕэ. Бу «хуреш» тустууга Сэмэн утарылаһааччытын хотон, бөҕөстөр киирсиэхтэрин иннинээҕи ритуальнай үҥкүүлэрин, “Хотой үҥкүүтүн” олус өрө көтөҕүллэн толорбутун Илин Сибиирдээҕи киинэ сурунаалга уһулбуттарын уонна «Спортивная жизнь России» диэн спортивнай сурунаал инники сирэйигэр туста сылдьар хаартыската тахсыбыта элбэҕи этэр.

РСФСР спордун маастара. Тувинецтар Сэмэни тустуук быһыытынан үрдүктүк сыаналаан, билинэн, РСФСР спордун маастарын аатын иҥэрэргэ мэктиэлээбиттэрэ, ону тэҥэ үйэлэргэ суураллыбат «Саха» диэн сөҕөн-махтайан туран аат иҥэрбиттэрэ.

Үөһээ Бүлүү Ороһутугар, бочуоттаах сынньалаҥҥа олорон, оҕону иитии боппуруоһугар туспа көрүүлэрдээх бөлүһүөк киһи бу эйгэҕэ бэртээхэй кинигэни таһаартарбыта.