Аркадий Уларов Прокопий Александров төрөппүт уола, онон Петр, Прокопий Александровтар бииргэ төрөөбүт убайдара, маны таһынан Ньургун Александров көҥүл тустууга Россия спордун маастара сиэн быраата буолар (бииргэ төрөөбүттэр сорохторо аҕаларын фамилиятынан Александровтар, сорохторо ийэлэрин фамилиятынан Уларовтар, төрөппүттэрэ оннук быһаарбыттар).

         Аҕалара Борокуоппай ырааҕынан тэлэһийэн тустубатах киһи буолан баран, оройуон, нэһилиэктэр ыһыахтарыгар эмиэ киһиттэн охтубатах киһи эбитэ үһү. Онон да буолуо, бу аймахха тустуу эттэригэр-хааннарыгар баар буолан, бары тустуу маастардара, ону ааһан улахан тустуулара Саха сирин, Россияны кыайа-хото сылдьыбыттар. 1991 с. спорт национальнай тустууларыгар, ол иһигэр куһааттаах, курдаһан тустууга Бүтүн Россия чемпионата ыытыллыбыт. Манна Саха сирин тустууга салалтата 4 бөҕөһү туһуннара ыыппыт: 60 кг Аркадий Уларов (Үөһээ Бүлүү), 70 кг Петр Бурцев (Дьокуускай) уонна ыарахан ыйааһыҥҥа Сергей Скрябин (Дьокуускай). Саха бөҕөстөрө төрдүөн бары Россия чемпионнара буолбуттара уонна төрдүөн Россия маастарын нуорматын толорон түөскэ кэтиллэр знак, дастабырыанньа туппуттара. Ити курдук Аркадий Прокопьевич Уларов көҥүл тустууга ССРС, курдаһан тустууга Россия, хапсаҕайга СР маастара буолбут, сахалартан үс тустуу маастарын аатын ылбыт аҕыйах ахсааннаах уһулуччулаах тустууктар ахсааннарыгар киирсэр.