Ан Михаил Иосифович 1980 с. Үөһээ Бүлүү оройуонугар Дүллүкү нэһилиэгэр төрөөбүтэ.

         Миша оскуолаҕа үөрэнэр сылларыттан атах оонньуутунан, сүүрүүнэн, тустуунан, волейболунан утумнаахтык дьарыктаммыта. Дүллүкү орто оскуолатын физкультураҕа учуутала Александр Михайлович Михайлов Мишаны спорт хас да көрүҥүнэн тэҥҥэ дьарыктаабыта. Миша оскуолаҕа үөрэнэр сылларыгар спорт ити көрүҥнэригэр оройуоҥҥа ыытыллар үөрэнээччилэр күрэхтэһиилэригэр мэлдьи бастыыр уонна призердуур этэ. Миша оскуоланы бүтэрээри сылдьан 1997 с. Ньурбаҕа ыытыллыбыт XV Манчаары Спартакиадатыгар хотугу многоборьеҕа оҕолорго үһүс миэстэни ылбыта. Ити сыл Михаил Саха госуниверситетын физкультурнай отделениетыгар үөрэнэ киирбитэ уонна хотугу многоборьенан күүскэ дьарыктанан, эрчиллэн барбыта. Спорт бу көрүҥэр кинини элбэх биллиилээх спортсменнары, маастардары иитэн таһаарбыт Василий Николаевич Сорокин анаан-минээн дьарыктаабыта. Михаил университетка үөрэнэр сылларыгар республикаҕа ыытыллар хотугу многоборье үгүс күрэхтэһиилэригэр чемпионнаабыта уонна призердаабыта, бу көрүҥҥэ Саха Республикатын спордун маастарын аатын ылбыта.

         Михаил Иосифович үөрэҕин бүтэрэн баран Россия Армиятыгар икки сыл сулууспалаабыта уонна Ис дьыала Министерствотын иһинэн ГАИ-га уон үс сыл эҥкилэ суох сулууспалаан баран пенсияҕа тахсыбыта, туйгун сулууспатын иһин мэтээллэринэн, элбэх ахсааннаах Бочуотунай грамоталарынан наҕараадаламмыта.

         Михаил Иосифович билигин Дьокуускай куоракка олорор, кэргэннээх, икки кыыс оҕолоох.