Григорьева Пелагея 1998 с. тохсунньу 19 к. Үөһээ-Бүлүү сэлиэнньэтигэр төрөөбүтэ. Паша оҕо эрдэҕиттэн сытыы-хотуу, туохтан да иҥнибэккэ иннин хоту сылдьар кыыс оҕо. Ол курдук оҕо саадыттан саҕалаан үҥкүүнэн, дуобатынан, сонорунан уонна хапсаҕайдаһан тустарын олус сөбүлүүр этэ. Онтон алын кылаас сүһүөххэ тахсан баран дьаныардаахтык сүүрүүнэн дьарыктаммыта. Онтон 10 кылааска хотугу многоборьенан дьарыктанан республика хас да төгүллээх чемпиона буолбута. Саха сирин сборнай хамаандатыгар киирэн иккитэ Россияҕа баран кыттыыны ылбыта. Ордук бу хотугу многоборье биэс көрүҥүттэн маамыкта быраҕарын сөбүлүүр. Бу көрүҥ туох баар былчыҥнары, өйү-санааны барытын сайыннарар эбит диэн түмүккэ кэлбитэ. Саха оҕото буоларбыт быһыытынан ордук хотугу многоборьенан дьарыктанар наадалаах эбит диир. Ол курдук Паша аҕыйах сыл бу көрүҥүнэн дьарыктаммыт диэтэххэ ситиһиилэрэ кырата суох. XIX Манчаары Спартакиадатыгар Чурапчыга национальнай многоборьеҕа үс көрүҥ түмүгүнэн 3 миэстэ буолан улууска элбэх очкону биэрбитэ. III кыһыҥҥы республикатааҕы Спартакиадаҕа Нерюнгри куоракка 2016 с. тус бэйэтэ түөрт көрүҥ түмүгүнэн 2 миэстэ буолан, хамаанда бастыырыгар төһүү күүс буолбута. 2015, 2016 сс. чемпионаттарга биэс көрүҥүнэн абсолютнай чемпион, аһаҕас турнирдарга элбэх төгүллээх призер буолбута. Буолаары турар XX Манчаары Спартакиадатыгар национальнай многоборьеҕа кыттаары бэлэмнэнэ сылдьар.