Лариса Евдокимова (Михалева) Үөһээ Бүлүү улууһугар 1989 сыл ахсынньы ый 16 күнүгэр Кырыкый нэһилиэгэр Мария, Дмитрий Михалевтар дьиэ кэргэннэригэр төрөөбүтэ, бииргэ төрөөбүттэр алталар — үс уол, үс кыыс. Лариса бииргэ төрөөбүт быраата Дмитрий гиирэ көтөҕүүтүгэр Россия спордун маастара, Аан дойду кубогын III этабын II призера, Саха сирин чемпиона.

         Лариса оҕо сылдьан сытыы, бэйэтин кыанар, сүрдээх имигэс этэ. Далырга тэриллибит циркэ студиятын биир бастыҥ иитиллээччитэ. Оскуола кэнниттэн Бүлүүгэ үөрэнэр, онтон салгыы Чурапчы институтун бүтэрэр. Бүлүүгэ үөрэнэр кэмигэр Васильев Григорий Васильевичка хотугу многоборьеҕа эрчиллэр уонна элбэх ситиһиилэнэр. Маҥнай СР спордун маастара буолар, онтон Чурапчыга үөрэнэр кэмигэр салгыы эрчиллэн Московскай уобаласка тиийэн бүтүн Россия чемпиона буолар, Россия спордун маастарын аатын ылар. Ити дьыл Саха сирин 10 бастыҥ спортсменнарын иһигэр киирэр. Элбэх сыралаах эрчиллиилэр кэннилэриттэн наартаны ойууга Саха сиригэр кими да тулуппат, республика рекордун олохтуур. Хотугу многоборье бары көрүҥнэригэр лаппа күүһүрэр, үстэ ойууга, наарта ыстаныытыгар, маамыкта быраҕыытыгар эриэ-дэхси көрдөрүүлээх күүстээх маастар буолар, ол түмүгэр 2011 с. Россияҕа иккиһин бастыыр, Уһук Илин Федеральнай уокурукка, Саха сиригэр Чурапчыга үөрэнэр кэмигэр субуруччу хаста да бастыыр. Үөрэҕин кэнниттэн ыал буолар уонна оҕолонон дьарыгын кылгас кэмҥэ тохтото сылдьан баран эмиэ салгыы дьарыктанан 2013 с. Чурапчыга буолбут XIX Манчаары Спартакиадатыгар III миэстэни ылар. Ити кэнниттэн 2016 с. Нерюнгри куоракка Саха сирин норуоттарын Спартакиадатыгар ситиһиилээхтик кыттар уонна чемпион үрдүк аатын ылар, Үөһээ Бүлүү хамаандата аан маҥнай кыһыҥҥы Спартакиадаҕа бастыырыгар төһүү күүс буолар.

         Лариса бу кэмҥэ үлэлии-үлэлии дьарыктанар уонна 2016 с. ахсынньытыгар хотугу многоборье Федерациятын кубогар СР куоталаһыытыгар бэйэтэ бастыыр уонна улуус хамаандата бастыырыгар кыаҕы биэрэр. Үөһээ Бүлүүгэ анаан-минээн спорт бу көрүҥэр урукку кэмҥэ улахан тэрээһин суох эрдэҕинэ, Кырыкый нэһиэлиэгин оҕолоро Альберт Иванов, Лариса Евдокимова-Михалева үөрэнэр кэмнэригэр Чурапчынан-Бүлүүнэн дьарыктанан Саха сирин бастыҥнара буолбуттара. Ол курдук аҕа саастааҕа А. Иванов 2005 с. Майаҕа буолбут XVII Манчаары Спартакиадатын абсолютнай чемпиона, Лариса Михалева 2009 с. Бүлүүгэ буолбут XVIII Спартакиада муҥутуур кыайыылааҕа буолбуттара. Манна даҕатан суруйдахха Лариса, Дима аҕалара Дмитрий Михалев анаан-минээн спордунан дьарыктамматаҕа эрээри, бэйэтин лаппа кыанар киһи, туох да үлэни тулуппат, ааттаах булчут, мууһу алларарга улууска бастыҥ, булка сатыы сылдьар уонна бэрт ыраах сирдэринэн тэлэһийэн бултуур ытаһа киһи. Ол иһин да буолуо, уоллаах кыыһа Саха сиригэр киэҥник биллэр спортсменнар буоллахтара.

         Бу кэмҥэ Лариса Михалева Дьокуускай куоракка “Модун” спорт комплекска оҕолору хотугу многоборьеҕа дьарыктыыр. Эдэр ыаллар аҕалара Владимир Анатольевич Евдокимов электрик идэлээх, идэтинэн үлэлиир. Түмүккэ Лариса дьиэ кэргэнигэр, үлэтигэр-хамнаһыгар ситиһиилэри баҕарыаҕыҥ.