Павел 1999 с. Үөһээ Бүлүүгэ төрөөбүтэ. Үөһээ Бүлүүтээҕи М.Т. Егоров аатынан 2-с №-дээх орто оскуола 11 кылааһын үөрэнээччитэ. Кини хотугу многоборьеҕа СР спордун маастара. Тренерэ Григорьева Раиса Васильевна.

         Павел аан маҥнай чэпчэки атлетиканан дьарыктаммыта уонна 2012 с. М.Ю. Плетнэр бирииһигэр 1000 м сүүрүүгэ III м ылбыта, ити дьыл бэйэтин саастыылаахтарыгар хотугу многоборьеҕа СР чемпиона буолбута. Павел итини таһынан хотугу многоборьеҕа 2015, 2016, 2017 сс. СР чемпиона. Маны таһынан университет аһаҕас күрэхтэһиитин, 2016 с. “Олимпийскай эрэллэр” күрэхтэһиитин чемпиона, 2016 с. Дьокуускай куорат, 2017 с. К.Н. Туприн бирииһин чемпиона.

         Павел Егоров хотугу многоборьеҕа Саха сиригэр ыытыллар үгүс турнирдарга үксүгэр I м ылар, ол курдук кини 15 куоталаһыыга кыттыбытыттан 12 төгүл бастаабыт, биирдэ 2-с, иккитэ 3-с миэстэ буолбут. Онон Павел өрүү үчүгэй көрдөрүүлээх, олох эрэллээх спортсмен буолар.

         Павел сүүрүү куоталаһыыларыгар эмиэ кыттар. 2014 с. К.Е. Корякин бирииһигэр 100 м дистанцияҕа III м, 2016 с. бу куоталаһыыга I м ылбыта, онон уол атаҕар кыанар, кылгас уонна орто дистанцияларга бэркэ сүүрэр. Павел оскуоланы ситиһиилээхтик үөрэнэн бүтэрэн салгыы үрдүк үөрэххэ үөрэниэн, спорт хайа баҕарар көрүҥнэригэр дьарыктанан ситиһиилэниэн сөптөөх таһымнаах оҕо. Киниэхэ үөрэҕэр уонна спортка үрдүктэн үрдүк ситиһиилэри баҕарыаҕыҥ.