Үөһээ Бүлүү улууһугар хотугу многоборьеҕа маҥнайгынан Саха Республикатын уонна Россия спордун маастара буолбута

         Улуус кииниттэн 10 көс ыраах сытар, кэрэ айылҕалаах, бултаах-алтаах, үтүө-мааны дьонноох-сэргэлээх Кырыкый нэһилиэгэр элбэх оҕолоох Ивановтар дьиэ кэргэннэрэ сүөһү-сылгы ииттэн, ньир-бааччы олорор ыалларга 1979 с. ахсынньы ый 15 к. Альберт Иванов төрөөбүтэ. Кини ыал кыра оҕото да буоллар, кыра эрдэҕиттэн убайдарын курдук хара үлэҕэ эриллэн улааппыта. Бэрт кыра сааһыттан от-мас үлэтигэр убайдарыттан хаалсыбакка үлэлиирэ. Ол иһин кыратыттан бэйэтин кыанар, сүүрэр-көтөр чэпчэки атахтаах оҕо киһи оскуоланы бүтэрэригэр сүүрүүгэ, атах оонньуутугар, тустууга улууска биллэр спортсмен буолбута. Альберт орто оскуоланы үөрэнэн бүтэрэн баран армияҕа сулууспалаан кэлээт  тутатына  Чурапчы физкультурнай институтугар үөрэххэ киирбитэ. Манна үөрэнэ сылдьан Үөһээ Бүлүү улууһугар соччо-бачча биллибэт спорт көрүҥүнэн,  хотугу многоборьенан дьарыктанан барбыта. Бэрт сотору наарта ойуутугар республика бастыҥнарын таһымыгар тиийбитэ, спорт маастара буолар нуорманы сиирэ-халты ойбута, дьарыгын эбэн биэрбитэ уонна республика чемпионатыгар 480 наартаны ойон СР спордун маастара буолбута. Уопсай түмүккэ бастыҥнар кэккэлэригэр киирэн СР сүүмэрдэммит хамаандатыгар ылыллыбыта. Дьэ ол кэнниттэн дьаныардаах, эт-хаан илистэр күүстээх дьарыгар киирбитэ, Россия чемпионаттарыгар кыайталаабыта.

         2003 с. Альберт Иванов Россия Кубогын иһин куоталаһыыга СР хамаандатыгар киирэн II м ылбыта, бу кэмҥэ кини хамаанда лидерэ этэ. Бу ситиһии 2004, 2005 сс. эмиэ хатыламмыта. 2005 с. XVII Манчаары Спартакиадатыгар Майаҕа Үөһээ Бүлүү хамаандатыттан кыттан абсолютнай чемпион буолбута. Ити дьыл Россия хотугу норуоттарын Фестивалыгар эмиэ муҥутуур кыайыылаах буолбута, СР норуоттарын иккис, үһүс спортивнай оонньууларыгар Хаандыгаҕа, Сунтаарга II м ылаттаабыта, 2005 с. СР чемпионатыгар абсолютнай чемпион буолбута. 2001, 2002, 2003, 2004, 2006 сс. СР чемпионатыгар II, III м ылбыта. Бу сылларга Альберт Иванов СР хамаандатыгар киирэн Россия чемпионатыгар кыттыбыта. Альберт Иванов наартаны ойууга 610 наартаны ыстанан Россия спордун маастара буолбута.

         Альберт Иванов бүтэһигин XIX Манчаары Спартакиадатыгар 2013 с. кыттыбыта уонна IV м ылбыта. Альберт Федорович билигин Чурапчы улууһугар спортивнай оскуолаҕа хотугу многоборьеҕа тренеринэн үлэлиир, эрчийэр оҕолоруттан үчүгэй көрдөрүүлээх спортсменнар үүнэн таҕыстылар, Саха сиригэр, Россияҕа бастыыр, миэстэлэһэр буоллулар.