Иван Иванов 1989 с. тохсунньу 11 к. Кырыкый нэһилиэгэр Иванов Николай Федорович дьиэ кэргэнигэр бастакы оҕонон төрөөбүтэ. Ваня ийэтэ, аҕата үөрэнэр кэмнэригэр эһэтигэр, эбэтигэр улааппыта. Бэйэтин кыанар оҕо этэ, тэбэнэтирэн ылар кэмнэрдээҕэ. Аҕатын быраата СР, РФ спордун маастара, хотугу многоборьеҕа СР уонна Манчаары Спартакиадатын абсолютнай чемпиона Альберт Иванов сабыдыалынан хотугу многоборье көрүҥүнэн дьарыктаммыта. Чурапчыга үөрэммит кэмигэр эрчиллэн спорт маастара буолбута. Сүрүннээн ыччаттарга күрэхтэспитэ. Ол курдук эдэрдэр куоталаһыыларыгар 2005 с. Дьокуускай куоракка 460 наартаны ойон чемпион буолбута уонна СР, РФ маастарын нуорматын толорбута. Бу кэмҥэ маастар буоларга 460 наартаны ойор норматив баара, ону Ваня чэпчэкитик толорбута. Онтон сотору 2-3 сылынан Хабаровскай куоракка 20 сааһыгар дылы саастаахтарга Уһук Илин чемпиона буолбута уонна сүгэни 168 м ыраахха тиийэ быраҕан маастар буолбута. Маны таһынан Иван 3000 м дистанцияҕа ураҕастаах сүүрүүгэ хотугу многоборье куоталаһыытыгар 2005, 2006 сс. СР чемпиона буолбута. Аркааны быраҕыыга биир оннук чемпионатка II м ылбыта. Ити курдук Иван Иванов куоталаһар кэмигэр эдэрдэргэ үрдүк көрдөрүүлэммитэ  уонна сотору күрэхтэһэрин тохтоппута.

         Иван иккис үрдүк үөрэҕин бүтэрэн экономист идэтин ылбыта, Нюргуяна Куприяновна диэн кэргэннээх, 2 кыыс оҕолоох. Иван Николаевич бу кэмҥэ Дьокуускай куоракка полицияҕа үлэлиир.

         Кырыкый нэһилиэгин спортивнай нэһилиэктэр ахсааннарыгар киллэриэххэ сөп. Элбэх хапсаҕай маастардара бааллар, волейбол оонньуута, бильярд спорда сайдар. Иван Иванов дьарыктаммыт хотугу многоборьета, төһө да Кырыкыйга дьарыктаммат спортарын көрүҥэ буолбутун иһин, Кырыкый ыччаттара бу көрүҥүнэн атын сирдэргэ дьарыктанан СР, Россияҕа тиийэ билиннилэр, чемпионнаатылар. Ол курдук Альберт Иванов СР, Россия спордун маастара, Михалева Лариса Дмитриевна СР, РФ спордун маастара, Саха сирин элбэх төгүллээх чемпиона, Россия икки төгүллээх муҥутуур кыайыылааҕа, Павел Егоров 1999 с. төрүөх уол быйыл СР маастара буолла, уолаттар ортолоругар республика муҥутуур кыайыылааҕа. Айсен Семенов 1999 с. төрүөх уол эмиэ 2016 с. маастар нуорматын толордо, онон биир кыра нэһилиэктэн хотугу многоборьеҕа биэс спорт маастардара баар буоллулар. Хотугу многоборье маастара Иван Николаевич Иванов үөрэхтэнэн, үчүгэй үлэни булунан, билиҥҥи уустук кэмҥэ олоххо оннун-тойун булла, барыта этэҥҥэ курдук, киниттэн ситиһиилэри күүтэбит