Аян 1998 с. бэс ыйын 20 к. Дүллүкүгэ төрөөбүтэ уонна Дүллүкү орто оскуолатыгар 9 кылааска дылы үөрэнэн баран Бүлүүтээҕи педагогическай колледж физкультура салаатыгар туттарсан үөрэнэ киирбитэ. Оскуолаҕа үөрэнэр кэмигэр сүүрүүнэн, атах оонньуутунан дьарыктанара, бу көрүҥнэргэ хоп курдук көрдөрүүлээх буолара. Бүлүүгэ үөрэнэ тиийээт хотугу многоборьенан дьарыктаммыта. Тренерэ Васильев Григорий Егорович, Аян 2016 с. алтынньы ыйыгар СР спордун маастарын нуорматын толорбута.

         Уол хотугу многоборье көрүҥнэриттэн наартаны ойууга, сүүрүүгэ, үстэ төхтүрүйэн ойууга күүстээх. Быйыл Үөһээ Бүлүү хамаандатын састаабыгар киирсэн ХХ Манчаары Спартакиадатыгар кыттар путевкалаах, онон аны сайын улууһун чиэһин көмүскээн үрдүк көрдөрүүнү ситиһиэхтээх. Биир дойдулаахтара уолларыгар Аяҥҥа эрэллэрэ улахан.