Уларовтар, Александровтар үһүс бырааттара Петр Прокопьевич Александров көҥүл тустууга ССРС, самбо тустууга ССРС, хапсаҕай тустууга СР спордун маастара буолар. Кини Харбалаахха Прокопий, Евдокия Александровтарга үһүс уолунан 1967 с. ахсынньы ый 17 к. күн сирин көрбүтэ. Харбалаахха 6 кылааһы бүтэрэн баран Нам оройуонугар тустуу оскуолатыгар үөрэнэ барар. 1987 с. дылы 4-5 сыл Борис Прокопьевич Егоровка эрчиллэр, тустуу оскуолатын ааһан баран, Советскай Армияҕа сулууспалыыр, үргүлдьү үс сыл 1988-1991 сс. Красноярскайдааҕы физкультурнай техникумҥа үөрэнэр. Ити үөрэнэр кэмигэр 57-62 кг ыйааһыннаахтарга 1989, 1990, 1991 сс. Красноярскай кыраай чемпиона буолар. Санаан көрүҥ, Красноярскай кыраай сэбиэскэй кэм саҕаттан киэҥник сураҕырар тустуу оскуолалааҕа, Аан дойду, Олимпиада чемпионнара иитиллэн тахсыбыт тустуу оскуолалаах кыраайга үс сыл субуруччу бастааһын, бу тустууга Петр хайдах таһымнааҕын көрдөрөр диэххэ сөп. 1990 с. “БАМ көбүөрэ” Бүтүн Союзтааҕы турниры кыайан ССРС спордун маастара буолар. 1993 с. Петр Александров Н. Тарскай бирииһигэр 62 кг III бириистээх миэстэни ылар. Бу дьыл самбо тустууга А. Харлампиев бирииһигэр Бүтүн Союзтааҕы турнирга чемпионнаан самбоҕа ССРС спордун маастара буолар. Хапсаҕай тустуунан 1986 с. дьарыктанар уонна аҕатыттан бэриллибит талаана арыллан, тута күүстээх хапсаҕайдьыт буолар. 1988 с. “Хаҥалас хапсаҕайын” кыайар, ити дьыл П.Е. Алексеев бирииһин хотор, бу ситиһиитин 2013 с. аны ветераннарга хатылыыр. Араас сылларга В. Румянцев, С. Ли-Фу, Бөҕө Тараҕай бириистэрин кыайар, миэстэлэһэр. 1995 с. 62 кг ыйааһыннаахтарга Манчаары Спартакиадатын кыайар. Онон Петр Александров 40 сааһын лаппа ааһыар дылы соргулаахтык тустар. Кини күүскэ тустарыгар удьуор-утум, ханнык да тустууга чочуллубут техниката, тустуу тактикатын баһылааһына  көстөллөр.

         1992 с. ыал буолар, Нам оройуонугар Ис Дьыала отделыгар оҕо милициятынан үлэлиир, онтон 1996 с. Дьокуускайга нолуок полициятыгар үлэлиир. Подполковник званиетыгар тиийэ үүнэр. 2003-2006 сс. наркотигы утары үлэлиир службаҕа үлэлиир. Петр Прокопьевич биир дойдулаахтара ыҥыраннар саҥа үлэҕэ киирбит спортзалга, Харбалаахха тренеринэн үлэлиир, кэргэнэ, кыыһа Дьокуускай куоракка олороллор, үлэлииллэр.

         Петр Прокопьевич дойдутугар кэлбитинэн Харбалаахха тустууга спортоскуола филиалын аһан тэрийэн үлэлэтэри салалта толкуйдуон наада. Петр Александров курдук үс тустуу маастарын билиитин-көрүүтүн, тустуу ымпыгын-чымпыгын оҕолорго үөрэтиэ-такайыа этэ буоллаҕа, сир аайы үстүү тустуу маастара суохтара чуолкай. Тэтиэнэх сылдьар тустуук Петр Александров наада тирээтэҕинэ билигин да борцовкатын кэтиэн сөп.

Петр хапсаҕайынан хойутуу, 1986 с. тустубута. Аҕата Борокуоппай ыраах сиринэн тэлэһийэн тустубатах бөҕөс эбитэ үһү эрээри, хайа баҕарар ыйааһыннаах бөҕөстүүн тэҥҥэ тустар киһи эбитэ үһү. Ону таһынан булчута, үлэһитэ, мээнэ киһи тэҥнэспэт эбит. Петр, онтон да атын уолаттар аҕаларыттан удьуордаан ааттаах-суоллаах бөҕөс буоллахтара. Борокуоппай эдэриттэн ат айааһыыра, сүүрдэрэ үһү, онон да буолуо, уолаттар үчүгэй сүһүөхтээхтэр. Мөлтөх илиилээх, атахтаах киһи аты айааһаабат, сүүрдүбэт. Ити курдук Петр бэйэтин кыанар киһи буолан үс тустуу маастара буоллаҕа.

         Хапсаҕайга Петр СР икки төгүллээх чемпиона, маҥнай 1988 с эдэрдэргэ бастаабыта, иккиһин 2012 с. ветераннарга бастаабыта. 1995 с. Төҥүлүгэ XIV Манчаары Спартакиадатыгар кыайбыта. Федерация Кубогар наада буоллаҕына төрөөбүт-үөскээбит Үөһээ Бүлүүтүн чиэһин мэлдьи көмүскээччи.

         Петр тустар 62, 70 кг ыйааһыннаахтарга Саха сирин бастыҥ бөҕөстөрө Василий Стручков, Прокопий Петров, Николай Яковлев, Дмитрий Васильев, Ефрем Ефремов, Николай Саввинов тусталлара, кини балары кытта тэҥҥэ тустара, сороҕор кыайталыыра, ол иһин да Саха сиригэр иккитэ бастаатаҕа, Манчаары Спартакиадатын кыайдаҕа. Кини хапсаҕай тустуу албастарын толору баһылаабыт бөҕөс, ол иһин да 1988 с. “Хаҥалас хапсаҕайа” республиканскай саамай улахан турниры кыайар. Араас сылларга В. Румянцев бирииһин Бүлүүгэ, Чурапчыга Бөҕө Тараҕай бирииһин, Намҥа С. Ли-Фу бирииһин чемпиона буолар. Дойдутугар Буучугурас, Бычырдаан бириистэрин эмиэ кыайталааччы. Онон Петр Александров хапсаҕай тустуу бары ымпыгын-чымпыгын билбит хапсаҕай тустуу улахан маастара.

Петр Прокопьевич үс тустуунан тэҥҥэ дьарыктаммыта, арай соҕуруу үөрэххэ сылдьар кэмигэр хапсаҕайтан тэйбит буолуон сөп. Ол эрэн дойдутугар кэлээт, 1988 с. Саха сирин чемпиона буолар. Маны таһынан Петр Прокопьевич Б.П. Егоров  салалтатынан эрчиллэн үрдүк кылаастаах маастар буолбута.

         Специалистар этэллэринэн, самбо уонна хапсаҕай майгыннаһар тустуулар, уратыта самбоҕо таҥастаах уонна волевой албастардаах. Ол эрэн самбо тустууга үчүгэй сүһүөхтээх, илиитигэр, атаҕар күүстээх дьон тусталлара ордук ситиһиилээх буолар дииллэр.

         Петр Прокопьевич 1993 с. самбо тустуу аҕатынан ааттанар А. Харлампьев Бүтүн Союзтааҕы турнирыгар I м ылар уонна ССРС спордун маастара буолар.