Аҕата Матвей Христофорович, ийэтэ Маарыйа. Бу ыаллар Боотулууттан Уус-Алданынан, Хороннон олорбуттара, сааһыран баран Кырыкый нэһилиэгэр аймахтарыгар тиийэн дьиэ-уот туттан, сүөһү ииттэн олорбуттара, кыра уоллара Алексей саҥа оскуоланы бүтэрбит уол тиийсибитэ. Кини Уус-Алдаҥҥа аатырбыт тренер Н. Рожиҥҥа көҥүл тустууга эрчиллибит этэ, онон Кырыкыйга бэлэм тустуук кэлбитэ. Ол эрэн,  хапсаҕай тустууну оччо биһирээбэт, билбэт этэ. Эдэр киһи Кырыкыйга кэлэн хапсаҕайдаспыта, сотору орто үчүгэйдик тустар буолбута. Илиитигэр  хоп курдук күүстээҕэ, атаҕар үчүгэйдик турара, ол кини хапсаҕайы баһылыырыгар тирэх буолбуттара. Кырыкыйга  спортсаалаҕа уолаттар мустан эрчиллэр этилэр, онно Алексей куруук сылдьара, эрчиллэрэ. Үөһээ-Бүлүүгэ буолар турнирдарга кыттара. Кини үксүн маҥнай утаа көҥүл тустуу албастарын туттара, сороҕор табыллара, үксүн тайанан, тобуктаан кэбиһэр этэ, ол хапсаҕайга хотторуу. Сыыйа күрэхтэһииттэн күрэхтэһиигэ тустара тупсан барбыта. Улууска бастыҥнар кэккэлэригэр тахсыбыта. 1997 с. 36 сааһыгар Ньурба куоратыгар П.Е. Алексеев бирииһигэр Саха Республикатын хапсаҕайга чемпионатыгар 62 кг ыйааһыҥҥа 29 бөҕөстөн II м ылбыта, манна кини иннигэр Хаҥалас бөҕөһө А. Шепелев эрэ түспүтэ. Бу тустууга Алексей сиппит-хоппут бөҕөс буолбутун көрдөрбүтэ. Улууска ыытыллар Докторов-Бычырдаан, Степанов-Буучугурас бириистэрин 60 кг  ыйааһыннарга холкутук кыайталаабыта, ити быыһыгар Федерация кубогар тустара, эдэрдэр ортолоругар Саха Республикатын чемпионатыгар 37-38-39 сааһыгар тустуталаабыта да, бириистээх миэстэҕэ киирбэтэҕэ.

         2002 с. үүнэр. Бу дьылга Алексей Буучугурас, В. Румянцев бириистэрин кыайар. Манна көрдөххө бөҕөс ветераннар ортолоругар адьас сибиэһэй, тилигирэс, кими да тулуппат этэ. Сайын ыһыахтарга да кими да тулуппатаҕа, онон ахсынньы ыйга буолуохтаах республика чемпионатын күүппүппүт, бу чемпионатка бастыыр сорук туруоруммута. Ахсынньы ый 21-22 күннэригэр Бүлүү куоратыгар чемпионат көбүөрэ тэлгэммитэ. Бу күрэхтэһиигэ ыалларбыт Бүлүүлэр бэрт үчүгэй бэлэмнээх күрэхтэспиттэрэ уонна 4 чемпионнаах, 6 призердаах команданнан бастаабыттара. Бу тустууга Үөһээ-Бүлүүлэртэн соҕотох Алексей Алексеев 60 кг ыйааһыннаахтарга ветераннар ортолоругар бастаабыта. Алексеев олус табыллан оҥорор албастара эҥкилэ суох сатанан 10 бөҕөстөн I м ылбыта  уонна Саха Республикатын чемпиона буолбута. Кини урут туттар албастарыттан өттүктээһин эрэ хаалбыт этэ, онтон көҥүл тустуу албастарын олох туттубат, дьиҥнээх хапсаҕай маастара буолбут этэ. 2003 с. эмиэ турнирдары холкутук кыайыталаабыта. Бу сыл республика чемпионата Мэҥэҕэ – Төҥүлү нэһилиэгэр буолбута, бу чемпионатка Үөһээ-Бүлүү хамаанда туруорбатаҕа. Алексей бэйэтин массыынатынан Кырыкыйтан 4 бөҕөһү уонна спорт маастара Валерий Иванову илдьэ баран кыттыбыттара. Бу чемпионатка Алексей 60 кг ыйааһыннаахтарга холкутук кыайбыта, ол курдук күүстээх бөҕөстөрү Р. Цыпандины, Сергей Степановы (Мэҥэ-Хаҥалас), В. Сивцевы (Уус-Алдан) хототтоон 2-с сылын субуруччу бастаабыта уонна Саха Республикатын хапсаҕайга спордун маастара буолбута. Бу күрэхтэһиигэ былырыыҥҥы чемпионатка курдук адьас холкутук бастаабыта, бэл, саха норуотун биир бастыҥ хапсаҕайдьыта Роман Цыпандин тулуспатаҕа.

         2004 с. үүнэр, бу сылга Алексей ыйааһына 65-66 кг буолбута, ол иһин Буучугурас бирииһигэр 70 кг ыйааһыннаахтарга боруобаламмыта да, эмиэ кими да тулуппатаҕа. Күүстээх бөҕөс М. Бочетовы финалга хотон бастаабыта. Онон сыыйа 70 кг көһөргө былааннаммыта эрээри, ол туолбатаҕа. Баара-суоҕа 42 сааһыгар олохтон букатыннаахтык барбыта.