Эльдар Эдуардович 1989 с. Бүлүү улууһун Кыргыдай нэһилиэгэр төрөөбүтэ. Эльдар оҕо эрдэҕиттэн эттээх-сииннээх, уһун уҥуохтаах уол этэ. Эһэтэ, саха биллиилээх тустууга, Саха АССР спордун маастара, Манчаары I Спартакиадатын чемпиона Семен Алексеев сиэнин бэрт кыратыттан хапсаҕайынан дьарыктаабыта, онтон салгыы Эльдар П.П. Ядреевка эрчиллибитэ. Оскуоланы үөрэнэн бүтэрэн баран Бүлүүтээҕи педучилище физкультурнай отделениетыгар үөрэнэ киирбитэ уонна салгыы П.М. Алексеевка тустууга эрчиллибитэ.

         Ити эрчиллэ сылдьан Буучугурас, В.Г. Румянцев, В.А. Быкалыров, В.Н. Ефремов, Р.М. Дмитриев бириистэригэр республикатааҕы турнирдарга миэстэлэһэн Саха Республикатын спордун маастара буолбута, Сунтаарга “өттүксүт” Федотов бирииһин абсолютнай чемпионун үрдүк аатын ылбыта.

         Эльдар Эдуардович Бүлүүтээҕи педучилищены ситиһиилээхтик үөрэнэн бүтэрэн баран төрөөбүт-үөскээбит Кыргыдайыгар спортинструкторынан үлэлээн баран 2012 с. Үөһээ Бүлүүтээҕи оҕо спортивнай оскуолатын Тамалакааннааҕы филиалыгар хапсаҕай тренеринэн дьоһуннаахтык үлэлии сылдьар, үүнэр көлүөнэни хапсаҕай алыптаах эйгэтигэр сыһыаран дьоһуннаах тустууктары иитэр-үөрэтэр.