Андрей Михайлович Андреев 1985 с. сэтинньи 25 к. Үөһээ Бүлүүгэ Анастасия Ивановна уонна Михаил Спиридонович Андреевтар дьиэ кэргэттэригэр төрөөбүтэ. Андрей Михайлович ийэтэ 1-кы №-дээх И. Барахов аатынан орто оскуола учуутала, аҕата ОДьКХ автотранспортнай хаһаайыстыбатын салайааччыта, иккиэн үлэ ветераннара. Балта Саргылана Михайловна “Вилюйавтодор” учаастагын маастара, быраата Арсен бэһис кылаас үөрэнээччитэ.

         Андрей үһүс кылааска, бииргэ төрөөбүт убайа Ваня төрдүскэ сырыттахтарына аҕалара оҕо спортивнай оскуолатыгар көҥүл тустууга биэрбитэ. Онно бастакы тренердэринэн Данил Николаевич Обулахов, Степан Алексеевич Жендринскэй эрчийбиттэрэ. Уолаттар тус-туһунан ыйааһыннарга тустан  кыттыбыт күрэхтэһиилэригэр барытыгар миэстэлэһэр, Үөһээ Бүлүүгэ, Бүлүү эҥээригэр буолар улуус да, республика да таһымнаах ыытыллар турнирдарга үксүгэр бастыыллара. Ол курдук,  1999 с. ыытыллыбыт Н.Н. Тарскай бирииһигэр үөрэнээччилэргэ көҥүл тустууга Бүлүү зональнай күрэхтэһиитигэр уонна эмиэ ити сыл Үөһээ Бүлүүгэ буолбут Н.Е. Афанасьев кэриэһигэр уолаттарга бастакы республиканскай турнирга бырааттыылар ыйааһыннарыгар  иккиэн бастаабыттара. Андрей ити сыл сэттис кылаас үөрэнээччитэ муус устар ыйга Саха сирин бастакы маастара Дмитрий Данилов бирииһигэр, республикаҕа орто саастаах уолаттарга бастыыр иһин күрэхтэһиигэ 35 кг диэри ыйааһыҥҥа 5 кыайыыны ситиһэн 23 оҕотон чемпион үрдүк аатын ылбыта. Ону таһынан уолаттарга П.П. Пинигин бирииһигэр бастаабыта. 2000 сыллаахха аҕата куоракка массыына ыла барбытыгар барсан, Дьокуускайга республиканскай турнир буола турарыгар Андрей үөһээ бүлүүлэртэн соҕотоҕун кыттан 2-с миэстэҕэ тахсыбыта. Ити кэмнэргэ Н.Н. Тарскай бирииһигэр республика чемпионатыгар оҕолору эмиэ кытыннарар этилэр.  Оннук биир күрэхтэһиигэ бырааттыылар иккиэн финалга тахсыбыттара уонна иккиэн кыл-мүччү, кыһыылаахтык хоттортоон иккис миэстэлэри ылбыттара. 2001 с. ахсынньы 5-6 кк. Үөһээ Бүлүүгэ 1985 сыллааҕы төрүөх уонна онтон кыра саастаах уолаттарга Н.Е. Афанасьев кэриэһигэр республикатааҕы иккис турнирга Андрей Андреев 55 кг диэри бастаабыта уонна “Турнир бастыҥ бөҕөһө” ааты ылан Үөһээ Бүлүүтээҕи оҕо спортивнай оскуолатын анал бирииһинэн наҕараадаламмыта. Андреев Ваня 2001 сыллаахха 11 кылааска сылдьан “Боотурдар оонньууларын” Бүлүү зонатынааҕы сүүмэрдиир күрэхтэһиитигэр 58 кг диэри бастаан сүрүн күрэхтэһиигэ путевка ылбыта. Покровскайга ыытыллыахтаах “Боотурдар оонньуулара” көҥүл тустууга үһүс республикатааҕы фестивала Хаҥалас улууһугар эбэ халааннаан турар кэмэ буолан ыытыллыбакка көһөрүллэн, Ваня ити күрэхтэһиигэ кыайан кыттыбакка хаалбыта. Эһиилгитигэр, 2002 сыллаахха, былырыыҥҥы призердар улааппыттарынан зоналартан, ахсаанынан сөп түбэһиннэрэн кытыннарбыттара. Онон Андрей 1985-86 сыллааҕы төрүөх уолаттарга 58 кг убайа ылбыт путевкатынан “Боотурдар оонньууларыгар” тустан бастаабыта. Онно финалга кини атаҕын эчэппитин үрдүнэн кыайбыта. Эчэтиитэ кырата суох этэ, күрэхтэһии кэнниттэн хонуохтаах элбэх этээстээх дьиэтигэр табаарыстара таһааран биэрбиттэрэ.

         Андрей оскуола кэнниттэн ХИФУ физкультурнай институтугар үөрэммитэ. Онно тренерэ Николай Николаевич Рожин этэ. 2004 сыллаахха Нерюнгрига ыытыллыбыт Уһук Илин уонна Сибиир территориальнай зонатыгар көҥүл тустууга юниордарга бастыыр иһин күрэхтэһиигэ чемпионнаабыта. Ити күрэхтэһиигэ ыйааһыҥҥа бастакы уонна иккис буолбут бөҕөстөргө Россия маастарын нуормата көрүллэр буолан Андрей Россия спордун маастара буолбута. 

         Армияҕа Камчаткатааҕы Петропавловскай куоракка Муоратааҕы пехота биригээдэтигэр сулууспалаабыта.

         Армияттан кэлэн баран Андрей Ис дьыала министиэристибэтин Үөһээ Бүлүүтээҕи отделын суолга сэрэхтээх буолуутун судаарыстыбаннай иниспиэксийэтигэр (ГИБДД) үлэлии киирэн баран иккис үрдүк үөрэҕин – ДьГТХА юридическэй факультетын бүтэрбитэ. Билигин Андрей Михайлович Таатта ГИБДД-тын начальнигынан үлэлиир.

         Кэргэнэ Ольга Ивановна Андреева, үс оҕолоохтор –Анесса, Артур уонна Егор.     

Андрей Андреев 2005 с. Үөһээ Бүлүүгэ ыытыллыбыт П. Алексеев бирииһигэр Саха сирин чемпионатыгар 62 кг 26 кыттааччыттан үһүс миэстэни ылбыта. Онно кыайыылаахтар, хотторуулаахтар диэн бөлөҕүнэн араарыы суох этэ — биир дойдулаахтарын Степан Родионову уонна Николай Семеновы кытта үһүөн хардары-таары хотуспуттара. Степан чемпион, Николай үрүҥ көмүс призер буолбуттара.

Андрей Үөһээ Бүлүү улууһугар хапсаҕайга икки республиканскай турнир ыытылларыттан тоҕо эрэ чуолаан аатырбыт буойун-спортсмен Н.К. Докторов-Бычырдаан бириистэригэр турнирдарга эрэ кыттыбыт. Ол курдук 2007 с. Үөһээ Бүлүүгэ 70 кг 25 киһиттэн аҕыһын охторон бастаабыта, 2011 с. Хороҕо ыытыллыбыт Бычырдаан республиканскай турнирыгар эмиэ ити ыйааһыҥҥа чемпионнаабыта. Оттон 2013 с. Үөһээ Бүлүүгэ ыытыллыбыт Н.К. Докторов төрөөбүтэ 100 сылыгар аналлаах турнирга иккитэ — бастаан ыйааһыныгар, онтон муҥутуур кыайыылаах аатын иһин күрэхтэһиини 70 кг диэри уонна онтон ыарахан ыйааһыннаахтарга диэн араартаан туһуннарбыттарыгар 70 кг диэри абсолютнай чемпион буолбута. Ити ситиһиитин иһин Бычырдаан сиэнэ Владислав Александрович Докторов Андрей Андреевка ботуччу сууммалаах сертификаты туттарбыта.

Андрей Михайлович хапсаҕайга улуус чемпионаттарын, араас нэһилиэк, улуус ыһыахтарын чемпионнара уонна призердара. Биир бэлиэ кыайыытынан 2010 с. Үөдүгэй нэһилиэгин ыһыаҕын хапсаҕайга абсолютнай чемпиона буолан улуус баһылыга В. Поскачин илии баттааһыннах Үөдүгэй нэһилиэгэр дьиэ туттарга аналлаах уһаайба сирин ыларга сертификатынан наҕараадаламмыта буолар.