Владимир Выборович Быкалыров 1968 с. атырдьах ыйын 8 к. Мария Тарасовна Чочуновская уонна саха аатырбыт хапсаҕайдьыта Выбор Алексеевич Быкалыров дьиэ кэргэттэригэр иккис оҕонон күн сирин көрбүтэ.

         Владимир 1993 с. Дьокуускайдааҕы 1-кы педучилище физкультурнай салаатын ситиһиилээхтик үөрэнэн бүтэрэн баран Үөһээ Бүлүүтээҕи 2-с №-дээх орто оскуолаҕа, онтон И. Барахов аатынан 1-кы №-дээх орто оскуолаҕа физкультура учууталынан үлэлээбитэ. Кэтэхтэн СГУ педагогическай факультетын физкультурнай отделениетын бүтэрбитэ.

         Владимир  Выборович хапсаҕайга үгүс ситиһиилэриттэн сүрүннэрин эрэ аҕыннахха: кини аҕатын Выбор Быкалыров бирииһигэр турнир 1992 уонна 1997 сс. абсолютнай кыайыылааҕа, 1995 с. Мэҥэ-Хаҥалас Төҥүлүтүгэр Манчаары XIV Спартакиадатыгар 70 кг иккис буолбута, ити сыл Ньурба Чуукаарыгар В. Ефремов бирииһигэр республиканскай турнир абсолютнай чемпионун, 1996 с. Үөһээ Бүлүү Сургуулугар бырааттыы Сэмэтээскилэр бириистэрин муҥутуур кыайыылааҕын ааттарын ылаттаабыта.

         1997 с. Ньурбаҕа П.Е. Алексеев бирииһигэр Саха Республикатын чемпионата аан бастаан ыытыллыбыта. Онно Владимир Быкалыров ыйааһыныгар иккис миэстэни ылбыта, абсолютнай чемпион аатын иһин киирсиилэргэ финалга тахсан, Максим Васильев (Ньурба) кэнниттэн эмиэ иккис буолбута, дойдутугар В.И. Степанов-Буучугурас бирииһигэр республиканскай турнирга 80 кг ыйааһыннаахтарга бастаабыта уонна абсолютнай чемпион буолбута.  Ону таһынан Бүлүүгэ В. Румянцев бирииһигэр 80 кг бастаабыта, ити сыл республиканскай турнирдар уонна чемпионат түмүктэринэн баал ааҕыллан “Сыл бастыҥ хапсаҕайдьыта” аат аан-бастаан олохтонон Владимир Быкалыровка иҥэриллибитэ. Ити рейтиҥҥэ үөһэ ахтыллыбыт Выбор Быкалыров турнира улуус таһымнаах буолан киирбэтэҕэ.

         1998 с. Владимир Кырыкыйга Степан Степанов-Түргэн турнирын муҥутуур кыайыылааҕа буолбута, эрдэ этиллибитин курдук Владимир Быкалыров үгүс күрэхтэһиилэргэ бастаабыта, миэстэлэспитэ суруллубатылар.

         Ветераннарга тахсан баран Үөһээ Бүлүү хамаандатыгар киирсэн хапсаҕайга СР Федерациятын Кубогар 2008 с. үһүс, 2009 с. бастакы миэстэ буолбута, 2009 с. Өргүөккэ Клавдий Захаров турнирын абсолютнай кыайыылааҕа, 2012 с. П. Алексеев бирииһигэр республика чемпионатыгар иккис миэстэ, 2013 с. хапсаҕайга I республиканскай фестиваль боруонса призера буолуталаабыта.