1941 с. сэтинньи 4 к. Үөһээ Бүлүү оройуонун Ороһу нэһилиэгэр төрөөбүтэ. Бүлүүтээҕи педагогическай училищены ситиһиилээхтик үөрэнэн бүтэрэн 1964 сылтан үлэтин Ороһу интернатын иитээччитинэн, Харбалаах алын сүһүөх оскуолатын сэбиэдиссэйинэн саҕалаабыта. Сылы кыайбат үлэлээт, дьону кытта дөбөҥнүк уопсай тылы буларын, эппитин толорторон тэйэрин, бэйэтэ туспа көрүүлээҕин, салайар талааннааҕын бэлиэтии көрөн ЫБСЛКС оройуоннааҕы кэмитиэтин бюрота Үөһээ Бүлүүтээҕи комсомол райкомун тэрийэр отделын сэбиэдиссэйинэн анаабыта.

Валерий Афанасьевич бүтүн күүстээх дьон утума буолан, сахаҕа аҥардастыы көрүллэр бөдөҥ-садаҥ, күүстээх-уохтаах, бэйэтин чахчы кыанар, спорт диэн баран муннукка ытаабыт киһи, саха национальнай тустуутун — хапсаҕайы кыайа тутар этэ. Улууһун үтүө аатын республика көбүөрүгэр чиэстээхтик көмүскүүр, хапсаҕайга республика чемпиона, Манчаары Спартакиадатын икки төгүллээх призера этэ.

Валерий Афанасьевич 1967 сылтан 1972 сылга дылы оройуоҥҥа аан маҥнай арыллыбыт Намнааҕы оҕо спортивнай оскуолатыгар тренеринэн, директорынан, 1972-1975 сс. Амма орто оскуолатын военругунан үлэлээн, элбэх оҕону чөл-чэгиэн олоххо, спорт алыбыгар угуйбута. Аскалон, Александр Кардашевскайдар, Аркадий, Николай Софроновтар, Константин Мандаров, Николай Давыдов, Устин Александров, Клавдий Захаров, Василий Данилов онтон да атын республика күүстээх тустууктара Валерий Афанасьевиһы улахан спортка уһуйбут бастакы тренердэрин күн таҥара курдук көрөллөр.

1975 с. балаҕан ыйын 20 күнүттэн 1979 с. дылы Ньурбатааҕы 3-с №-дээх СПТУ филиала Үөһээ Бүлүү оройуонугар Нам нэһилиэгэр арыллан, онно преподавателинэн ананан, ыччат дьону үлэҕэ, олоххо үөрэппитэ.

1979-1984 сс. Исидор Барахов аатынан совхоз хаһаайыстыбаннай чааһыгар директоры солбуйааччынан ананан, киэҥ далааһыннаах үлэни ыыппыта.

1984 с. кулун тутартан Валерий Афанасьевич государственнай-муниципальнай тутуу суолугар үктэммитэ. Ол курдук, кинини төрүт дойдутун дьоно норуот депутаттарын Ороһутааҕы сельскэй сэбиэттэрин исполкомун председателинэн талбыттара.

1987-1995 сс. Нам сельскэй сэбиэтин председателинэн талыллан, дьон өйүгэр-санаатыгар хаалар гына, таһаарыылаахтык үлэлээбитэ. Кини үлэлиир кэмигэр бэртээхэй стадион тутуллубута.

1995-2007 сс. Ороһу нэһилиэгин баһылыгынан, нэһилиэк Сэбиэтин председателинэн ситиһиилээхтик үлэлээбитэ. Оҕо сайыҥҥы сынньанар базата, спортивнай саала, интернат, оҕо саадын дьиэлэрэ тутуллубуттара. Валерий Афанасьевич норуот педагогикатын музейын базатын хаҥатыыга, нэһилиэк музейын тэрийиигэ, “Күбэйэ” эбэлэр түмсүүлэрин үлэтин сүрүннэһиигэ үгүс тэрээһин үлэни ыыппыта, сүбэ-соргу буолбута.

Валерий Афанасьевич улууска 131-с №-дээх Федеральнай сокуону, олохтоох бэйэни салайыныыны киллэриигэ үтүөтэ-өҥөтө улахан. Кини 2-с ыҥырыылаах улуус мунньаҕын депутатынан быыбарданан, киэҥ далааһыннаах үлэни ыытыспыта, улуус социальнай-экономическай сайдыытыгар сүдү кылааты киллэрсибитэ.

Бырдакаров В.А. олоҕун тиһэх күннэригэр дылы төрөөбүт-үөскээбит, үүнэн-сайдан тахсыбыт Үөһээ Бүлүүтүн кэлэр кэскилин түстэһэ, үгүһү туруорса, үлэ-хамнас үөһүгэр сылдьыбыта. Ороһу партийнай тэрилтэтин солбуйааччы секретарынан дьоһуннаахтык үлэлээбитэ, тэрилтэ улууска, республикаҕа бастыҥ үлэлээх тэрилтэнэн биллэр.